Gjykata e Lartë ka lënë në burg ish-Presidentin Ilir Meta. Në vendimin e marrë këtë të enjte në Dhomë Këshillimi nga trupa e gjyqtarëve e përbërë nga Medi Bici, Ilir Panda dhe Albana Boksi, është vendosur rrëzimi i rekursit të ish-presidentit për zbutjen e masës së sigurisë.
Meta i cili mbahet i arrestuar prej tetorit të vitit të kaluar, kërkoi një masë më të butë sigurie, ku një ndër argumentet e theksuara në rekurs, lidhej me pozicionin e tij si drejtues i forcës së dytë opozitare në vend dhe situatës në prag të zgjedhjeve parlamentare të 11 Majit.
Ish-presidenti akuzohet nga SPAK për korrupsion, pastrim parash e fshehje pasurie lidhur me dosjet e bashkuara CEZ-DIA, lobimi i ish-LSI në SHBA dhe shpenzimet e familjes së tij.
Për kreun e PL, Gjykata e Posaçme dhe ajo e Apelit kanë lënë në fuqi masën e “arrestit në burg”, duke bërë që Meta prej afro 4 muajsh të mbahet i izoluar në paraburgimin “Jordan Misja” në kryeqytet apo siç njihet ndryshe 313-ta.
Edhe Kryemadhi, ndaj së cilës është marrë masa” detyrim paraqitje” ka depozituar rekurs duke e etiketuar masën të paligjshme. Megjithatë, edhe kërkesa e saj u rrëzua në Dhomë Këshillimi nga Gjykata e Lartë.
Meta pas vendimit: Do fitoj në Strasburg
Pas vendimit, në “FB’ e kreut të PL u publikua nga nje audiomesazh nga vetë Meta, i cili lë të kuptohet se e priste një vendim të tillë nga Gjykata e Lartë, që e quan të kapur politikisht nga kryeministri Edi Rama. Megjithatë ai shtoi se çështjen do e çojë në Strasburg, duke shprehur bindjen se do të fitojë.
“11 Maj, dita historike kur do të ndahemi nga narkoregjimi dhe narkodrejtësia e tij, Sot për çështjen Meta hodhëm një hap pozitiv sepse kaluam edhe një pengesë fiktive, Gjykatën e Lartë që nuk ekziston, në mënyrë që të ecim më shpejt drejt Gjykatës së Strasburgut. Pa asnjë diskutim do të fitojmë ashtu siç kemi fituar edhe në Komisionin e Venecias kundër Ramaformës”, shprehet Meta.
“Mos harroni se 2 Marsi po vjen dhe bashkë me të edhe 5 Dhjetori i atij mitingu të jashtëzakonshëm mbarëkombëtar patriotik në mbrojtje të Kushtetutës falë të cilit jo vetëm u çmontua Ramaforma. U bëj thirrje simpatizantëve të PL, anëtarëve, shqiptarëve patriotë kudo ku janë të gjithë drejt 11 Majit, Të gjithë bashkatdhetarët tanë të nxitojnë të regjistrohen të marrin pjesë në këtë ditë historike ku narkoregjimi do të hidhet tek Lana. Malet tona më të larta”, shton ai.
Avokati i Metës: Rekurs në Kushtetuese
Avokati i Metës, Genc Gjokutaj, tha se pas vendimit ë sotëm të Gjykatës së Lartë, hapi i ardhës është rekursi në Gjykatën Kushtetuese.
Ai shprehu bindjen se, Meta, s’duhet mbajtur as në arrest shtëpie.
“GJEDNJ e ka të konsoliduar jurisprudencën në këto raste. Ka një rrezikshmëri zero, mbajtja në burg jo vetëm që dëmton atë si person e si president të PL, por po konsolidon paligjshmërinë e gjykatës”, shtoi avokati gjatë një prononcimi në një emision televiziv.
Sipas tij, “vendimi është marrë jashtë asaj gjykate”. “Kjo Gjykatë e Lartë ka shkelur ligjin disa herë, këto janë vendime jo ligjore, të bazuar në pagrykësinë për pushtet të kësaj mazhorance që e do të pastër rrugën për në zgjedhjet e 11 majit”, shtoi Gjokutaj.
Discussion about this post