Një sasi lënde plasëse ka shpërthyer pas mesnatës në ambientin e jashtëm të një lokali, në Tiranë.
Policia bën me dije se lënda plasëse është vendosur në pjesën e jashtme të lokalit, që ishte në pronësi të 44-vjeçarit Sotiraq Halili, në rrugën “Ramazan Gaxherri”, në zonën e Shkozës.
Nga shpërthimi ka vetëm dëme të vogla materiale dhe fatmirësisht nuk ka persona të dëmtuar.
Pronari i lokalit, 44-vjeçari Sotiraq Halili ka pohuar se nuk ka dijeni mbi personat që mund t’i keni vendosur lëndën plasëse. Ai ka mohuar të ketë konflikte, por pista kryesore që policia po heton është ndonjë konflikt i mundshëm i tij.
“Rreth orës 01:15, është marrë njoftimi se në rrugën “Ramazan Gaxherri”, në ambientin e jashtëm të një lokali të mbyllur në pronësi të shtetasit S. H, rreth 44 vjeç, dyshohet se ka plasur një sasi e vogël lëndë plasëse. Si pasojë ka vetëm dëme të vogla materiale. Nuk ka persona të dëmtuar. Grupi hetimor po punon për sqarimin e rrethanave të ngjarjes, identifikimin dhe kapjen e autorit/eve”, njoftoi policia.
Ky është rasti i dytë i sulmeve ndaj bizneseve në Tiranë në pak ditë. Javën e kaluar, u sulmua me breshëri kallashnikovi godina e biznesit “CFO Pharma” në pronësi të Nadir Çaushollit, në zonën e Kasharit, buzë autostradës Tiranë-Durrës. Nga ngjarja nuk pati persona të lënduar, ndërsa autorët mbeten ende të paidentifikuar.
Ndërsa më herët gjatë muajit ngjarje të ngjashme janë shënuar edhe në Lezhë, Krujë, apo Fushë-Krujë.
Discussion about this post