Kryeministri Edi Rama u ka bërë thirrje mbështetësve të opozitës, që të mos marrin pjesë në zgjedhjet parlamentare të 11 majit. Në një komunikim në rrjete sociale, kreu i qeverisë sulmoi opozitën dhe u sugjeroi qytetarëve që, në vend që të votonin kundërshtarët e tij, të qëndronin në shtëpi.
“Rri më në shtëpi fare… Po të dalësh e të shkosh të hedhësh votën në kënetë, ua,” tha Rama, duke bërë një apel që bie ndesh me një nga të drejtat themelore të Kushtetutës së vendit dhe të një demokracie funksionale.
“Kurrë mos votoni e mos votofshi për mua dhe për Partinë Socialiste, po, si mund të shkoni mbas një të roituri? Që i fiket llamba tre herë në ditë tani më se dhe mosha tepër e thyer bën të vetën, edhe që vetëm i ka sjellë atij vendi halle e rrëmuja e turbullira. E që s’i ka mundësi. Unë s’e kuptoj ç’a kërkoni, nuk e marr vesh. Doni më mirë, doni më shumë, normal fare. Normal fare rri më në shtëpi fare, rri në shtëpi dakord, rri në shtëpi, mos dini fare hiç. Po të dalësh e të shkosh të hedhësh votën në kënetë, ua”, ishte deklarata e kreut të qeverisë.
Thirrje të tilla janë të përsëritura nga kryeministri. Gjatë një aktiviteti më 8 mars, Rama iu drejtua grave shqiptare me një apel të drejtpërdrejtë që të ndalonin burrat të votonin në zgjedhjet e 11 majit. “Burrat mbajini në shtëpi më 11 maj,” theksoi ai.
Këto deklarata kanë ngjallur reagime, pasi konsiderohen si përpjekje për të dekurajuar pjesëmarrjen në votime – një veprim që cënon një nga parimet thelbësore të demokracisë.
E drejta për të votuar është e garantuar nga Kushtetuta e Republikës së Shqipërisë dhe nga konventat ndërkombëtare për të drejtat e njeriut. Neni 45 i Kushtetutës shqiptare përcakton qartë se: “Çdo shtetas shqiptar që ka mbushur moshën 18 vjeç ka të drejtën të zgjedhë dhe të zgjidhet.”
Çdo përpjekje për të ndikuar në heqjen dorë nga kjo e drejtë, veçanërisht kur vjen nga një figurë institucionale si kryeministri, mund të shihet si cënim i së drejtës kushtetuese për të zgjedhur.
Në parim, kryeministri duhet të jetë qytetari i parë që mbron dhe garanton ushtrimin e lirë të të drejtave demokratike dhe jo t’i relativizojë apo t’i minojë ato.
Discussion about this post