Një ngjarje e rëndë ka tronditur mëngjesin e sotëm lagjen “Hajro Çakërri” në qytetin e Vlorës, ku rreth orës 06:00 është gjetur i pajetë një shtetas 58-vjeçar, i identifikuar si Renato Hoxhaj.
Sipas informacioneve paraprake, viktima dyshohet se është vrarë me armë zjarri pranë banesës së tij, ndërsa mësohet se ai punonte si roje në një objekt ndërtimi në afërsi të banesës së tij.
Sipas policisë 58 vjeçari Renato Hoxhaj është qëlluar me tre plumba, dy në kokë dhe një në kraharor.
Ndërkohë mësohet se 58-vjeçari nuk ka pasur asnjë precedent të mëparshëm penal, ndërsa në zonë njihej si njeri jo problematik. Ai ishte i divorcuar dhe baba i dy fëmijëve.
Policia ka ngritur menjëherë një grup të posaçëm hetimor, i cili, nën drejtimin e Prokurorisë, po punon intensivisht për të zbardhur rrethanat e ngjarjes, për të siguruar provat dhe për të identifikuar autorin ose autorët e mundshëm.
Njoftimi i policisë
Sot, rreth orës 06:00, në lagjen “Hajro Çakërri”, në rrugë, në afërsi të banesës së tij, është gjetur pa shenja jete, dyshohet i vrarë me armë zjarri, shtetasi R. H., 58 vjeç, i cili ishte i punësuar dhe si roje në një objekt në ndërtim pranë banesës së tij.
Është ngritur një grup i posaçëm hetimor dhe, nën drejtimin e Prokurorisë, vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve.
Discussion about this post