Berisha falënderon votuesit dhe apelon: Votoni masivisht për të ardhmen tuaj dhe të vendit

Kryetari i Partisë Demokratike, Sali Berisha, ka reaguar sot, ditën e zgjedhjeve, duke falënderuar qytetarët që kanë marrë pjesë në votim deri në këtë moment dhe ka lëshuar një thirrje për pjesëmarrje masive të mëtejshme në procesin zgjedhor.

Në një deklaratë për mediat, Berisha shprehet mirënjohës ndaj atyre që tashmë kanë hedhur votën e tyre, duke e cilësuar këtë si “një detyrim madhor të çdo shqiptari mbi moshën 18-vjeçare”, një detyrim ndaj vetes, familjes, shoqërisë, Shqipërisë dhe kombit.

Një falënderim dhe mirënjohje e veçantë i adresohet “mijëra e mijëra shqiptareve dhe shqiptarëve që nuk u regjistruan dot për shkak të burokracive dhe frikës së qeverisë ndaj votës së tyre, por kanë vërshuar nga ajri, nga toka dhe nga deti dhe janë dyndur sot dhe po votojnë në Shqipëri”. Sipas Berishës, këta qytetarë, me votën e tyre, “i gjenden vendit dhe kombit në një moment, në të cilin kanë nevojë shumë të madhe”.

Në pjesën e dytë të deklaratës, fokusi zhvendoset te thirrja për të votuar. “Edhe njëherë thirrja ime është për çdo shqiptar: voto, voto, voto!”, thekson Berisha. Ai e lidh fort aktin e votimit me interesat personale dhe kolektive, duke i bërë thirrje qytetarëve të votojnë “për veten tënde, për fëmijët e tu, për vendin tënd, për të ardhmen tënde, të fëmijëve të tu, për biznesin, për rrogat, për pensionet, për fermën”.

Berisha e përmbyll deklaratën duke theksuar se ky votim është “më shumë se kurrë për interesat më të rëndësishme të çdo qytetari”, duke inkurajuar kështu çdo person të dalë në qendrat e votimit.

Duke iu përgjigjur interesit të mediave lidhur me parregullsitë e raportuara në procesin e votimit, tha: “Tani, çdo gjë ka një vëzhgim ndërkombëtar shumë serioz dhe vëzhgim kombëtar po kaq serioz. Dhe secili që merr përsipër të shkelë ligjin në këtë proces, do bëhet përgjegjës në mënyrë absolute”.

“Një gjë mund t’u them se sot sovrani jep një verdikt historik… …Unë them sot sovrani do japë një verdikt historik dhe kjo është e vërteta Po cili është ai që nuk i bindet historisë? Pra, kështu është kjo”, shtoi ai.