Ish-kryeministri Sali Berisha ka reaguar pas publikimit të konstatimeve paraprake të OSBE-ODIHR mbi zgjedhjet e pjesshme të 11 majit, duke i cilësuar ato si “madhore” dhe si një rrëzim de facto i procesit zgjedhor.
“Në datën 16 maj fillon protesta për një sensibilizim të udhëheqësve evropianë që vijnë në Shqipëri, për t’u treguar se ndodhen në një narkoshtet që nuk respekton asnjë rregull, asnjë parim të demokracisë. Jo sepse e themi ne, por sepse e thonë katër rezoluta ndërkombëtare që udhëheqin botën,” tha Berisha.
Ai theksoi se opozita do të dorëzojë prova të dokumentuara mbi atë që e cilësoi si “batërdinë elektorale të regjimit”, duke shtuar se kjo është një kauzë e drejtë në mbrojtje të votës së shqiptarëve.
“Nuk ka legjitimitet mbi krimin. Gjysmë milioni shqiptarë të lirë nuk mund të shtypen kurrë. Janë më të fuqishëm e më guximtarë se çdo aparat shtypës,” u shpreh ai, duke shtuar se opozita ka bërë gjithçka për një proces të ndershëm dhe nuk do të pranojë një mandat të bazuar mbi krimin.
Deklarata e Berishës vjen në një moment të tensionuar politik, me akuzat për manipulime dhe presione në zgjedhjet e fundit që kanë sjellë reagime të shumta brenda dhe jashtë vendit.
Discussion about this post