Kombëtarja shqiptare e futbollit ka zhvilluar një ndeshje të luftuar dhe me momente interesante përballë Serbisë në stadiumin “Air Albania”, por në fund nuk ka mundur të shkojë më shumë se një barazim pa gola. Rey Manaj, në fund të pjesë së parë, humbi rastin më të mirë duke mos e shënuar penalltinë e fituar nga Hysaj,
Që në minutën e parë, Shqipëria tregoi ambicien për të marrë kontrollin e lojës, me Shehun që provoi me një gjuajtje nga distanca. Manaj u tregua aktiv në sulm, por pa arritur të finalizojë rastet e krijuara. Në minutën e 11-të, Mitaj lëshoi një predhë nga largësia, por portieri serb Petrovic grushtoi topin.
Pjesa e parë u karakterizua nga një lojë e ndërprerë shpesh, me arbitrin që nxori dy kartona të verdhë në pak minuta, për Pavloviç të Serbisë dhe kapitenin e Shqipërisë, Gjimshitin. Në minutën e 45-të, Shqipëria fitoi një penallti pas ndërhyrjes së Samarxhiç ndaj Hysajt, por Manaj nuk arriti ta shfrytëzojë, duke parë gjuajtjen e tij të pritur nga Petrovic.
Edhe në pjesën e dytë loja ishte e luftuar. Në minutën e 53-të, Strakosha shpëtoi Shqipërinë pas një gjuajtjeje me kokë të Mitroviç. Në minutën e 63-të, trajneri Sylvinho bëri dy zëvendësime, duke futur Dakun dhe Bajramin në vend të Manajt dhe Hoxhës.
Ndeshja u ndërpre shkurtimisht në minutën e 66-të për shkak të hedhjes së sendeve në fushë nga tribuna, por rifilloi shpejt pas apelit të spikerit të stadiumit. Në vazhdim, të dyja skuadrat kërkuan golin e fitores. Për Serbinë, A. Mitroviç provoi me kokë në minutën e 74-të, por topi shkoi mbi traversë. Për Shqipërinë, Bajrami pasoi për Dakun në minutën e 72-të, por gjuajtja e tij u prit nga portieri.
Në minutat e fundit të takimit, Shqipëria pati një mundësi të artë me Asllanin që provoi nga goditja e këndit në minutën e 79-të, por topi kaloi mbi traversë. Në minutën e 82-të, Joviç i Serbisë gjuajti, por mbrojtja kuqezi bllokoi tentativën e tij. Trajnerët bënë edhe zëvendësime të tjera në pjesën e dytë, por asnjëra skuadër nuk arriti të shënojë.
Në fund, Shqipëria dhe Serbia u ndanë në barazim pa gola, duke marrë nga një pikë në Grupin K të kualifikueseve të Botërorit 2026. Pavarësisht lojës së mirë dhe penalltisë së humbur, Shqipëria nuk arriti të shkojë më shumë se një barazim në këtë sfidë të rëndësishme.
Discussion about this post