Nxjerrja e Roland Bejkos nga oborri i selisë së PD-së gjatë protestës së 8 janarit, bëri xhiron e të gjithë mediave, pasi mbështetësit e Berishës u konfliktuan me të dhe nuk e lanë që të hynte në selinë e PD-së, duke e shtyrë, fyer dhe goditur.
Në një prononcim në emisionin në emisionin “Opinion”, Bejko ka nxjerr detaje nga kjo ngjarje që i ndodhi.
“Pashë fytyra të njohura. Mora të sharat e para dhe goditja e parë, jashtë kamerave. Nuk e pashë personin, ishte një person me çadër dhe xhup blu. Dikush më qëllon nga mbrapa me goditje të fortë në fund të kërbishtit, që më dhembi shumë.
Më pas pashë një person e kam takuar në Gjirokastër. Ka punuar në SHIK, sa herë Berisha vinte në Gjirokastër, ka qenë person që e shoqëronte Berishën. Kthehem dhe i them, edhe ti qëllon o Brut? Në atë moment më qëllon me çadër përballë në fytyrë” – tha Bejko.
Ai tha se është sharë, pështyrë dhe goditur, ndërkohë kishte dhe fytyra të njohura dhe njerëz të afërt të Berishës.
“Në këto kushte, i sharë, i pështyrë, i ofenduar dhe goditur, pashë një fytyrë të njohur. Një person që njihja dhe më ka ndihmuar. Aty janë edhe disa persona të afërt të Berishës. Më thanë më vonë se ata jo vetëm më kanë sharë dhe goditur, por kanë thënë fjalët më banale.
Vetëm emocionin e frikës nuk provova. Shikoja në fytyrat e tyre, vetëm Sali Berishën, nuk mbaja mend fytyrat e tyre. Kam deklaruar se janë të falur, sa dola nga aty. Janë demokratë dhe janë të falur” – tha ndër të tjera Bejko.
Discussion about this post