Mrekullia e Dinamos! Eliminon Hajdukun dhe kualifikohet në Play Off të Conference League!

Në një mbrëmje historike në “Air Albania”, Dinamo ka arritur të bëjë mrekullinë, duke eliminuar gjigantin kroat, Hajdukun e Splitit, dhe duke u kualifikuar për në fazën Play Off të Conference League. Ndeshja përfundoi me rezultatin 3-1 pas kohës shtesë, duke zhvlerësuar humbjen 2-1 në ndeshjen e parë dhe duke ngjitur Dinamon në raundin tjetër për herë të parë në histori.

Heroi i kohës së rregullt ishte Zabërgja, i cili shënoi golin e parë në minutën e 14-të, duke ndezur festën në stadium. Gjatë pjesës së dytë, kroatët mbetën me 10 lojtarë pas kartonit të kuq të Sanyang, por ndeshja shkoi në kohën shtesë.

Koha shtesë nisi me një goditje të fortë për Dinamon, pasi Hajduku barazoi shifrat 1-1 me anë të Karaçiç në minutën e 99-të. Por, kjo nuk i dekurajoi blutë.

Në minutën e 109-të, Qardaku realizoi një eurogol, duke e kaluar Dinamon sërish në avantazh me 3-1 në total. Çmenduria në “Air Albania” nuk përfundoi këtu. Vetëm dy minuta më vonë, Berisha shënoi golin e tretë, duke i dhënë Dinamos një fitore të madhe dhe kualifikimin e merituar. Berisha ishte hero edhe në minutat e fundit, kur largoi një top nga vija fatale, duke vulosur fitoren.

Pas këtij suksesi historik, Dinamo do të përballet me ekipin polak të Jagiellonia-s në raundin Play Off. Polakët arritën të eliminojnë Silkeborgun pas një barazimi 2-2 në ndeshjen e kthimit dhe një fitoreje 1-0 në duelin e parë. Dinamo do të kërkojë të vazhdojë ëndrrën e saj europiane, duke synuar kualifikimin në fazën e grupeve të Conference League.

Presidenti i Federatës Shqiptare të Futbollit (FSHF), Armand Duka, ka reaguar pas fitores historike të Dinamos ndaj Hajdukut të Splitit. Përmes një postimi në Facebook, Duka e cilësoi kualifikimin si “fantastik” dhe “të merituar”.

“Një rezultat fantastik i Dinamo City ndaj Hajduk Split, një kualifikim i merituar në ‘Air Albania’ pas një ndeshjeje plot me emocione që mbaroi me rezultatin 3-1 për skuadrën tonë në shtesë,” shkroi Duka. Ai shprehu dëshirën që Dinamo të vazhdojë rrugëtimin e saj drejt fazës së grupeve të UEFA Conference League.