Policia ka goditur një rrjet të trafikut të armëve të zjarrit që vepronte nga Shqipëria drejt Anglisë. Në kuadër të operacionit të koduar “Metoda”, u arrestuan dy persona dhe u shpall në kërkim një tjeter, të gjithë nga Shkodra.
Gjatë kontrollit të ushtruar në një kamion në zonën e “Bulevardit të ri” në Tiranë, Policia gjeti dhe sekuestruar një armë pistoletë me silenciator, e ndarë në pjesë dhe e fshehur brenda një televizori.
Në pranga ranë shtetasit Jurgen Suca, 26 vjeç, dhe Segest Meti., 20 vjeç, ndërsa në kërkim është shpallur shtetasi R. A., 20 vjeç. Të tre dyshohen se kanë tentuar të trafikonin armën pa dijeninë e pronarit të kamionit.
Nga hetimet ka dalë se Segest Meti ka një të kaluar kriminale, pasi ai është dënuar në Angli me 3 vite e 2 muaj burg për plagosje me thikë në Basingstoke, ngjarje e ndodhur më 13 janar 2024.
Meti ka qenë gjithashtu çiklist i njohur dhe ka qenë pjesë e ekipit të Vllaznisë.
Policia po vazhdon hetimet për të zbuluar të tjera detaje dhe për të arrestuar personat e tjerë të përfshirë në këtë grup kriminal.
Discussion about this post