Bledar Selmanaj, i akuzuar për vrasjen e Xhulian Bullarit, tentoi të arratiset mëngjesin e së mërkurës nga Burgu i Fierit, por përpjekja e tij dështoi në momentin e fundit.
Sipas Drejtorisë së Përgjithshme të Burgjeve, rreth orës 03:48 të datës 24 Shtator 2025, Selmanaj ka hapur një vrimë në mur me mjete rrethanore dhe është ngjitur në tarracë përmes një tubi metalik, duke shmangur të gjitha perimetrat e sigurisë. Ai u kap nga efektivët e burgut pas lokalizimit dhe u vendos menjëherë në qeli të izolimit.
Autoritetet sqarojnë se ky nuk është rasti i parë i Selmanajt, pasi ai ka tentuar edhe dy herë më parë arratisjen nga institucionet e ekzekutimit të vendimeve penale, por pa sukses. Gjatë ndalimit, ai ka kundërshtuar me forcë punonjësit e policisë së burgjeve.
Selmanaj u arrestua më 21 gusht 2021 në zonën e ish-Bllokut në Tiranë, katër ditë pas ekzekutimit të Xhulian Bullarit në aksin Vlorë-Babicë. Viktima u gjet e vdekur në një makinë tip Fiat Punto, ku sipas ekspertizës u qëllua me tre plumba, duke marrë një goditje në kokë që i shkaktoi vdekjen e menjëhershme.
Shkak për vrasjen dyshohet të jenë bërë mosmarrëveshjet për pazare droge. Sipas hetimeve, autori dhe viktima njiheshin më parë dhe kishin bashkëpunuar në aktivitetin kriminal. Konflikti ka nisur për një pagesë prej 3 mijë eurosh me euro false, në një marrëveshje për shitjen e rreth 100 kg hashash në Elbasan.
Discussion about this post