Përsëri perime me pesticide nga Shqipëria, Kroacia bllokon 8 mijë kg speca të kuq djegës

Tetë mijë kg speca nga Divjaka janë bllokuar sot nga autoritetet e Kroacisë.

Mësohet se kjo sasi speci i kuq djegës e madhe është bllokuar pasi ka rezultuar me tre preprarate bujqësore të ndaluara.

Bëhetë e ditur se sasia e ndaluar do të asgjësohet në Kroaci.

Ky nuk është një rast i izoluar. Vetëm një muaj më parë, edhe Kroacia e Sllovenia kthyen mbrapsht domatet shqiptare për shkak të pesticideve. Pra, nuk flasim më për incidente sporadike, por për një fenomen të përsëritur, ku Autoriteti Kombëtar i Ushqimit del përherë i kapur në befasi dhe tregon hapur paaftësinë e tij. Në vend që të bëjë kontrolle serioze para se produktet të eksportohen, AKU zgjohet vetëm pasi bllokimi ndodh jashtë kufijve tanë.

Kjo është një goditje e dyfishtë: nga njëra anë,fermerët e ndershëm dëmtohen rëndë, pasi puna e tyre bie nën dyshimin e përgjithshëm; nga ana tjetër, emri i Shqipërisë përlyhet, duke u kthyer në sinonim të produkteve me pesticide. Ndërsa Kroacia shkatërron tonelata me produkte shqiptare, AKU shfaqet vetëm nëpër konferenca dhe komunikata boshe, duke bërë sikur kujdeset për sigurinë ushqimore.

Ironia është se produktet që nuk kalojnë dot kufirin, me shumë gjasë qarkullojnë lirshëm në tregjet tona të brendshme. Pra, ndërkohë që Europa i refuzon, ne i konsumojmë pa asnjë problem në tryezat tona, të shitur si “bio” e “100% shqiptare”.