Deputeti demokrat Oerd Bylykbashi, i ftuar në A2CNN, theksoi se raporti i OSBE/ODIHR-it për zgjedhjet ka qenë “më i rëndi që ka pasur për Shqipërinë”.
“Gjatë periudhës paszgjedhore i çuam provat ODIHR-it dhe presim që raporti t’i ketë reflektuar, ndërkohë që raporti paraprak, në eksperiencën time, është më i rëndi që ka Shqipëria”, tha Bylykbashi.
“Standardi i tyre është që raporti del brenda dy muajsh nga përfundimi i procesit. Dhe procesi ligjor ka zgjatur shumë më tepër, me ankimime… Rezultati është certifikuar në ditët e para të shtatorit. Që do të thotë se ODIHR-i do t’i pasqyrojë të gjitha aspektet që ka. Arsyeja që kanë marrë kaq kohë për raportin është kjo”, shtoi Bylykbashi.
Sipas tij, “Rama dhe ministri i Jashtëm kanë bërë presion të jashtëzakonshëm dhe të papranueshëm mbi ODIHR-in”.
“I faktuar edhe me prova: letra e ministrit Hasani, që ishte skandaloze. Qeveria e kuptoi që ai raport dhimbte. Ka vënë në lëvizje të gjithë mekanizmat. Nga ana tjetër, ne kemi bërë të pamundurën dhe kemi dërguar prova, duke faktuar atë që ndodhi në 11 Maj. Bandat dhe shtetin bashkë. Jo më kot hapet që në fjalinë e parë që të ndahet shteti nga partia”, u shpreh Bylykbashi.
Ndërkohë Bylykbashi u shpreh se Presidenti Bajram Begaj ka kryer shkelje të rëndë me firmosjen e dekretit të zgjedhjeve të pjesshme.
“Edi Rama e ka vendosur zotin Begaj në pamundësinë e ushtrimit të detyrës. Thjesht, ai firmos atë që i sjellin. Nuk mund të arsyetohet që një kryetar bashkie të shkarkohet nga Kryeminisri si t’i dojë qejfi. Shkarkohet nga Këshilli i Ministrave për shkelje të rëndë. A është mosparaqitja në zyrë shkelje e rëndë? Patjetër. Por, kur je në kushtet e arrestit dhe prezumohesh i pafajshëm, pavarësisht se çfarë dinë njerëzit për të”, tha Bylykbashi.
“Kjo përplasje po tregon se jemi në fazën e një zhbërjeje të funksionimit të shtetit mbi bazat e Kushtetutës. Pra, Rama mund të bëjë çfarë të dojë”, tha Bylykbashi.
Sipas deputetit demokrat, “Begaj ka kryer një shkelje të rëndë”.
“Nëse ia vërteton edhe Gjykata Kushtetuese, ai është fundi fare. Instrumentat janë në Kushtetutë, por kërkohet shumicë e cilësuar për shkarkimin e Presidentit. Kështu që, ne mund të mbetemi me një shëmti të madhe mbi tryezë, por pa askënd që mban përgjegjësi”, u shpreh Bylykbashi.
Bylykbashi ka reaguar edhe për kandidatët për Bashkinë e Tiranës. “Qasja e Partisë Demokratike nuk është diskutimi i emrave të veçantë. Emra ka më shumë sesa 3”. Kështu u shpreh deputeti demokrat Oerd Bylykbashi,
“Fokusi është gjetja e modelit, që i përshtatet një serie rrethanash, në funksion të objektivit që është fitorja e zgjedhjeve. Do të jetë kandidat politik, për të cilin palët bien dakord. Edhe nëse nuk ka ekspozimin e radhës së parë politike, mbetet një figurë që investohet politikisht nga opozita”, sqaroi Bylykbashi.
“Ajo që ka bërë PD-ja është hapja e një fronti sa më të madh dhe për të farkëtuar një lidhje mes partive opozitare, që do të jetë garancia e fitores. Ne e pamë edhe në zgjedhjet e fundit, që koalicionet e përbërë nga interesa të paqarta, prodhuan konflikte për mandate”, shtoi Bylykbashi.
“Qasja jonë ka qenë te modeli që do të prodhojë kandidatin. Për të tre emrat e lakuar kam shumë respekt, por nuk janë vetëm këto emra. Ka edhe të tjerë. Kur të gjejmë modelin, do të zgjedhim personin që i atashohet më mirë atij modeli”, theksoi më tej deputeti i Partisë Demokratike.
Discussion about this post