Nënkryetari i Kuvendit, si dhe i Partise Demokratike, Agron Gjekmarkaj e ka konsideruar si kambanë alarmi për gjithë shqipërinë vrasjen e ndodhur në Manzë, ku mbetën viktimë Aranit Kurti dhe Flori Paluçi.
Gjekmarkaj, në një deklaratë publike shpreh shqetësimin e thellë për gjendjen e sigurisë në vend dhe kritikon institucionet përgjegjëse.
Gjekmarkaj thekson se kjo nuk është një ngjarje e izoluar kriminale, por një kambanë alarmi për të gjithë shoqërinë dhe një aktakuzë ndaj strukturave që, sipas tij, janë kthyer në institucione të paralizuara dhe të shkëputura nga realiteti.
“Nuk mund të ketë siguri publike kur ministrja e Brendshme, znj. Albana Koçiu, merret me adresat e qytetarëve, ndërsa drejtori i Policisë, z. Ilir Proda, ka ‘adresën’ e përditshme shumë larg detyrës së tij,” vijon më tej deklarata.
Deklarata
Për ngjarjen tragjike në Manzë, Durrës
Ngjarja tragjike e ndodhur në Manzë, ku dy të rinj humbën jetën në mënyrë të dhunshme, është një tjetër dëshmi e hidhur e degradimit të sigurisë publike dhe dështimit të institucioneve përgjegjëse për rendin dhe parandalimin e krimit në vendin tonë.
Kjo nuk është thjesht një ngjarje kriminale. Kjo është një kambanë alarmi për të gjithë shoqërinë dhe një aktakuzë e drejtpërdrejtë ndaj Ministrisë së Brendshme dhe Policisë së Shtetit, të cilat janë kthyer në institucione të paralizuara, të shkëputura nga realiteti dhe interesat e qytetarëve.
Nuk mund të ketë siguri publike kur ministrja e Brendshme znj. Albana Koçiu merret me adresat e qytetarëve, ndërsa drejtori i Përgjithshëm i Policisë, z. Ilir Proda, ka “adresën” e përditshme shumë larg punës së tij dhe përgjegjësive që i takojnë.
Ky është rezultati i politizimit ekstrem të institucioneve të rendit, mungesës së vizionit, përgjegjësisë dhe angazhimit serioz për të luftuar krimin dhe për të garantuar jetën e qytetarëve. Kur shteti tërhiqet, krimi avancon. Dhe sot, jemi përballë një realiteti ku jeta e të rinjve shqiptarë po preket në mënyrën më tragjike, në mes të ditës, pa asnjë ndjenjë frike nga drejtësia.
Ngushëllimet më të sinqerta familjeve të viktimave. Kërkojmë urgjentisht hetim të thelluar, ndëshkim të autorëve dhe përgjegjësve institucionalë. Por më shumë se kaq, kërkojmë që shteti të kthehet në shërbim të qytetarëve, jo në strehë për paaftësinë dhe indiferencën.
Koha e lojërave politike me sigurinë e njerëzve duhet të marrë fund.
Discussion about this post