Kushtetuesja e ktheu në detyrë, Veliaj thumbon Ramën: U rivendos dinjiteti i ligjit

Erion Veliaj ka reaguar për herë të parë pas vendimit të Gjykatës Kushtetuese që vendosi ta rikthente në detyrë duke rrëzuar vendimin e shkarkimit nga Këshilli i Ministrave.

Teksa kunjos Ramën dhe të besuarit e tij në bashkinë Tiranë të cilët “ia futën mbas shpine”, Veliaj shprehet se Gjykata Kushtetuese rivendosi dinjitetin e ligjit dhe besimin se shteti ka ende busull.

“Për shkak të kushteve ku ndodhem, vetëm tani munda të çoj këtë pusullë-postim me avokatët.

Drejtësia kushtetuese foli.

Vendimi i Gjykatës Kushtetuese nuk ishte një vendim për të më kthyer mandatin mua, por për t’ua kthyer atyre që ju përket, popullit të Tiranës.

Ky nuk është një vendim për një njeri, por për demokracinë shqiptare, për votën e lirë dhe për çdo qytetar që beson se pushteti buron nga populli dhe i përket atij.

Gjykata Kushtetuese rivendosi jo thjesht një mandat, por dinjitetin e ligjit dhe besimin se shteti ka ende busull. E drejta mund të vonojë, por nuk harron.

Faleminderit çdo qytetari të Tiranës që besoi, që priti dhe që nuk u dorëzua.

Unë do të bëj çdo gjë që është në dorën time, që puna të vijojë, dhe do të kërkoj pa u ndalur që të mos pengohem në ushtrimin e mandatit që më keni besuar.

Tirana nuk ndalet.”- shkruan Veliaj.

Me vendimin që mori Kushtetuesja, Rama nuk i krijon asnjë kokëçarje vetes për të hyrë në zgjedhje të parakohshme lokale për Tiranën dhe ai mban nën kontroll bashkinë e kryeqytetit me njerëzit e tij të besuar, ndërkohë që Veliaj qëndron në paraburgim, i akuzuar për “korrupsion” dhe “pastrim parash”.

Por, megjithatë, ai u shfaq i mllefosur vetëm një ditë më pas me anëtarët e Gjykatës Kushtetuese që votuan “pro-Veliajt”.

Në një postim në rrjetin “X” këtë të Martë (4 nëntor 2025), ai la të kuptohet se shumica e Gjykatës Kushtetuese kishte tejkaluar “dëshirën” e tij, duke mos u mjaftuar thjesht me mos shkarkimin e Veliajt, por duke i dhënë këtij të fundit edhe një mundësi teorike që ai të lirohet e të rikthehet në zyrë, me argumentin e masës së sigurimit “jo-proporcionale”. Dhe kjo shkon në të kundërt të asaj që dëshiron Rama.