Presidenti turk Recep Tajip Erdogan mbërrin sot Tiranën, në një vizitë që ai do të zhvillojë në vendin tonë dhe që pritet të zgjasë rreth 13 orë, ku nuk do të jetë vetëm në kryeqytetin shqiptar, por edhe në Laç, ku do të inspektojë nga afër punimet e bëra në zonën e Kurbinit në kuadër të procesit të Rindërtimit.
Kjo vizitë e Erdogan në këtë 17 janar përkon pikërisht me 554-vjetorin e heroit kombëtar, Gjergj Kastrioti (Skënderbeu), simbolin e rezistencës shqiptare ndaj pushtimit të Perandorisë Osmane në trojet shqoptare dhe më gjerë në Ballkan. Madje dhe investimi i turqëve, që mund të ishte bërë kudo në vendet e prekura nga tërmeti, u zgjodh të bëhej pikërisht në Laç, zonë që përkon me Sanxhakun (ndarje territoriale) e Kurbinit, si një shenjë e miqësisë mes dy vendeve.
Vizita e Erdogan sot në vendin tonë ka bërë që të gjitha institucionet e sigurisë të marrin masa të shtuara, duke filluar që nga bllokimi i rrugëve e deri tek mbikqyrja me forca të shtuara të Gardës së Republikës dhe forcave RENEA, të cilat kanë ‘pushtuar’ Tiranën e jo vetëm. Por, për mbarëvajtjen dhe ruajtjen e sigurisë fizike të Presidentit turk, ka ardhur nga Ankaraja edhe një ekip efektivësh të Gardës së Turqisë dhe shërbimet sekrete, të cilat janë ndarë, një pjesë do të qendrojnë në Laç, ndërsa pjesa tjetër do të jetë e pozicionuar në Tiranë.
Vizita e kreut të shtetit turk ka vënë në gjendje të plotë gatishmërie edhe Policinë e Shtetit, e cila ka marrë masa për bllokimin e disa akseve kryesore rrugore, mes të cilave edhe aksin Tiranë – Durrës, ndërsa ka apeluar qytetarët, të cilët do të udhëtojnë jashtë vendit të mbërrijnë në Aeroportin e Rinasit përpara orareve të kufizimit, përkatësisht përpara orës 08:30 të mëngjesit të 17 Janarit.
Aeroporti i Rinasit dhe akset që lidhin kryeqytetin me të do të jenë prej sot në mesditë nën masa të larta sigurie ndërsa kufizimet do të preknin autostradën me drejtim Rinas-Vorë-Tiranë, Rrugën e Durrësit dhe Bulevardin Dëshmorët e Kombit ditën e hënë paradite. Rrugët në të cilat do të ndalohet tërësisht qarkullimi janë Milot-Vorë-Milot nga 07 deri në 14 për kamionët dhe makinat. Kurse nga 08:30 deri në 12:30 ndalohet mbikalimi Laçit si dhe Rinas-Vorë-Rinas nga ora 08:30 deri në ora 10:00. Bllokime do të kenë edhe akset në Tiranë, autostrada e Rinasi, Rruga e Durrësit, bulevardi ‘Dëshmorët e Kombit’ etj.
AXHENDA E PLOTË E ERDOGAN NË SHQIPËRI:
Në orën 09.20 pritet mbërritja e Presidentit të Republikës së Turqisë në Aeroportin e Rinasit dhe pas 5 minutash fillon ceremonia e mireseardhjes.
Pas kësaj Presidenti turk niset drejt Laçit, ku në orën 10.05 bëhet ceremonia e dorëzimit të shtëpive të ndërtuara pas tërmetit në Laç. Do të ketë edhe një fjalë të Presidentit turk.
Në orën 11.30 Erdogan do të zhvillojë një vizitë në shtëpinë e një familjeje në Laç, ndërsa në 11.45 pritet të mbahet ceremonia e emërtimit të sheshit në Laç me emrin e Presidentit të Republikës së Turqisë.
Më pas në orën 13.00 Erdogan mbërrin në Tiranë dhe zhvillon një takim më Kryeministrin Rama, ndërkohë që, në orën 16.00 zhvillohet ceremonia Zyrtare e Inaugurimit të Xhamisë së Et’hem Beut.
Në orën 17.00 Presidenti i Republikës së Turqisë pritet të mbajë një fjalë drejtuar Kuvendit të Shqipërisë dhe në 18.00 do të bëhet nisja e tij drejt Aeroportit të Rinasit për të fluturuar drejt Turqisë.
Discussion about this post