Pezullimi i zv.kryeministres Belinda Balluku nga detyra dhe bllokimi i pasaportës së saj me vendim të GJKKO ka bërë jehonë në mediat ndërkombëtare.
GJKKO vendosi sot dy masa ndaj Ballukut; pezullimin e saj nga detyra dhe sekuestrimin e pasaportës, duke i ndaluar daljen nga territori i Shqipërisë, pasi ajo akuzohet për shkelje të barazisë në tendera.
Lidhur me këtë Reuters ka publikuar një artikull me titullin “Gjykata shqiptare shkarkon zv.kryeministren pas akuzave për korrupsion”.
Artikulli i plotë
Një gjykatë në Shqipëri shkarkoi nga detyra zëvendëskryeministren Belinda Balluku të enjten, pasi ajo u padit nga prokurorët për rolin e saj të dyshuar në përzgjedhjen e një kompanie për të ndërtuar një tunel të financuar nga qeveria, tha gjykata në një deklaratë.
Nuk pati asnjë reagim të menjëhershëm nga Balluku. Megjithatë, gjatë një seance parlamentare të mërkurën, ajo iu referua akuzave si “shpifje, insinuata, gjysmë të vërteta dhe gënjeshtra” dhe tha se do të bashkëpunonte plotësisht me gjyqësorin.
Balluku, e cila shërbeu gjithashtu si Ministre e Infrastrukturës dhe Energjisë, është një aleat i ngushtë i Kryeministrit të vendit, Edi Rama, i cili siguroi kete vit mandatin e tij të katërt radhazi.
Gjykata nuk dha më shumë informacion në vendimin e saj, “duke pasur parasysh se masa të tilla janë të natyrës konfidenciale”.
Më 31 tetor, Prokuroria e Posaçme, SPAK, tha se kishte ngritur padi ndaj Ballukut për veprën penale të shkeljes së barazisë së pjesëmarrësve në një tender.
Akuzat lidhen me ndërtimin e një tuneli prej 5.9 kilometrash (3.7 milje) në pjesën jugore të Shqipërisë me një kosto prej afërsisht 190 milionë eurosh.
Aktakuza, e parë nga Reuters, thotë se Balluku, në cilësinë e saj si ministre e infrastrukturës, ndikoi në mënyrë të papërshtatshme në vendimin në favor të kompanisë fituese. Aktakuza pretendon më tej se ajo e bëri këtë në bashkëpunim me pesë anëtarë të tjerë të komisionit vendimmarrës.
Shqipëria synon të anëtarësohet në Bashkimin Evropian deri në vitin 2030, por BE po kërkon që vendi të bëjë më shumë për të luftuar krimin dhe korrupsionin.
Ekathimerini: Gjykata shqiptare shkarkon zv.kryeministren pas përfshirjes në korrupsion
Gjykata e Posaçme për Krimin e Organizuar dhe Korrupsionin në Shqipëri vendosi pezullimin nga detyra të zv.kryeministres dhe ministres së Infrastrukturës dhe Energjisë, Belinda Balluku, pas padisë së ngritur nga Prokuroria e Posaçme (SPAK) për dyshimet e përfshirjes së saj në përzgjedhjen e një kompanie fituese për ndërtimin e tunelit të Llogarasë, një projekt qeveritar me fond rreth 190 milionë euro.
Balluku nuk ka reaguar menjëherë për vendimin e gjykatës, por gjatë seancës së së mërkurës në parlament e quajti akuzën “përçmim, insinuata, gjysmë të vërteta dhe gënjeshtra” dhe deklaroi se do të bashkëpunojë plotësisht me autoritetet.
Prokuroria akuzon se Balluku, në rolin e saj si ministre, ka ndikuar në mënyrë të padrejtë për të favorizuar kompaninë fituese dhe ka vepruar në bashkëpunim me pesë anëtarë të tjerë të komisionit që mori vendimin.
Ky rast vjen ndërsa Shqipëria synon anëtarësimin në Bashkimin Europian deri në vitin 2030, dhe Brukseli kërkon nga vendi veprime më të forta kundër korrupsionit.
gijotina.com/
Discussion about this post