Ministri rumun i Mbrojtjes, Ionut Mosteanu, ka njoftuar dorëheqjen e tij pasi pranoi se ka bërë një “gabim” në diplomat universitare që ka renditur në CV-në e tij zyrtare, e cila është shumë e diskutueshme.
Mosteanu pranoi se kishte deklaruar në biografinë e tij se ishte diplomuar në një universitet që nuk e kishte ndjekur dhe tha se diskutimet rreth tij nuk duhet ta shpërqendrojnë udhëheqjen e shtetit në një kohë kur “Rusia sulmon Rumaninë dhe Evropën”.
“Sot po jap dorëheqjen nga pozicioni im si Ministër i Mbrojtjes”, shkroi ai në Facebook. “Siguria jonë kombëtare duhet të mbrohet me çdo kusht”, shtoi ai.
Rumania ka regjistruar shkelje të shumta të hapësirës së saj ajrore, me pjesë të dronëve që kanë rënë në territorin e saj që nga fillimi i pushtimit rus të Ukrainës në vitin 2022.
Bukureshti akuzoi gjithashtu Moskën për “sulme hibride” dhe ndërhyrje në zgjedhjet presidenciale të vitit të kaluar, të cilat më vonë u anuluan.
Mosteanu ishte nën presion pas publikimit të djeshëm të një hetimi gazetaresk i cili zbuloi se ai kishte shkruar në CV-në e tij se ishte diplomuar në një universitet ku në fakt nuk kishte studiuar.
Ai kërkoi falje po atë ditë dhe tha se ishte një gabim.
“Në CV-në që e përpilova me nxitim në vitin 2016 bazuar në një model të gjetur në internet, ka një gabim që e pranoj se më shqetëson. Nuk u kushtova vëmendje të mjaftueshme këtyre detajeve në atë kohë”, shkroi ai në Facebook.
Mosteanu u emërua ministër i mbrojtjes në qershor, kur u formua një qeveri e re pro-evropiane pas muajsh trazirash politike.
Kryeministri Ilje Boložan tha në një deklaratë se do të propozojë Ministrin e Ekonomisë dhe Turizmit, Radu Miruta, që të marrë përkohësisht portofolin e Ministrit të Mbrojtjes.
Discussion about this post