Edhe pse sot është ditë pushimi zyrtar, zyrat e postës në të gjithë vendin janë hapur posaçërisht për të pritur pensionistët, të cilët kanë nisur të tërheqin bonusin e fundvitit.
Që prej orëve të para të mëngjesit, dhjetëra qytetarë janë paraqitur për të përfituar ndihmën financiare të akorduar nga qeveria për festat e fundvitit.
Sipas Institutit të Sigurimeve Shoqërore, mbi 540 mijë përfitues do të marrin bonusin prej 15 mijë lekësh. Mes tyre janë të moshuarit me pension deri në 20 mijë lekë, përfitues të pensioneve të invaliditetit, pensioneve familjare e sociale, si dhe disa kategori të tjera.
Ndërkohë, mbi 221 mijë persona të tjerë do të përfitojnë bonusin prej 10 mijë lekësh, që përfshin ata me pension mbi 20 mijë lekë, përfituesit e pensioneve të parakohshme dhe trajtimeve të veçanta financiare.
Bonusi i fundvitit mund të tërhiqet gjatë gjithë muajit dhjetor, ndërsa për ata që nuk kanë mundësi brenda kësaj periudhe, afati i fundit i tërheqjes është 30 qershor 2026.
Sipas Ministrisë së Financave, për këtë skemë janë alokuar 7.6 miliardë lekë, prej të cilave 5.9 miliardë lekë janë fonde shtesë të dedikuara posaçërisht për bonusin e fundvitit që mbulon rreth 750 mijë pensionistë.
Ndërkohë, qeveria ka paralajmëruar se nga muaji janar i vitit të ardhshëm do të nisë një rritje graduale mujore e pensioneve, përtej indeksimit të zakonshëm vjetor, një masë që pensionistët e shohin me optimizëm.
Discussion about this post