Në Gjykatën e Posaçme, këtë të martë po zhvillohet seanca për dosjen “Plumbi i Artë”, ku po dëshmon Henrik Hoxhaj, i cili fillimisht kishte statusin e bashkëpunëtorit të drejtësisë, por që më pas iu hoq nga SPAK.
Gjatë dëshmisë së tij, Hoxhaj tregoi mënyrën se si u organizua dhe u ekzekutua vrasja e Dorjan Shkozës, për një pagesë prej 70 mijë eurosh.
Sipas tij, porosia është dhënë nga Nuredin Dumani, i cili vepronte për llogari të personit të njohur si “Krymi”.
Hoxhaj deklaron se njohja me Nuredin Dumanin ka ndodhur në vitin 2020, gjatë festës së ditëlindjes së Festim Qolit.
“U njohëm duke ngrënë e duke pirë, shkëmbyem numrat e telefonit. Disa muaj më pas u takuam sërish. Ai ishte i interesuar të më takonte”, ka rrëfyer Hoxhaj, duke shtuar se komunikimet mes tyre dyshohet se janë kryer edhe përmes telefonave të kriptuar.
Sipas dëshmisë, Dumani i ka propozuar fillimisht përfshirjen në disa vrasje në qytetin e Durrësit. “Më tha që kishte disa punë për t’u bërë dhe më pyeti nëse isha i interesuar. I thashë po”, ka deklaruar Hoxhaj.
Në këtë kontekst u diskutua edhe vrasja e Dorjan Shkozës, e cila do të kryhej kundrejt pagesës prej 70 mijë eurosh.
Hoxhaj pohon se armët dhe mjeti janë siguruar nga Dumani, ndërsa shofer i automjetit ishte Elio Bitri, nga Elbasani. Ngjarja ka ndodhur gjatë periudhës së pandemisë. Ditën e atentatit, sipas tij, janë takuar fillimisht te banesa e Dumanit në Durrës dhe më pas janë nisur me një makinë të zezë drejt vendit të ngjarjes.
“Në makinë ishim tre. Elio ishte në timon, unë mbrapa shoferit. Unë kisha dy armë, Elio një. Nuredini u nis me ne”, ka treguar Hoxhaj. Ai shpjegon se pasi kaluan një herë pranë servis-it ku ndodhej objektivi dhe nuk e gjetën aty, u kthyen sërish.
“Ishin tre persona në trotuar. Elio më tha: ja ku janë. I qëllova nga brenda makinës. Një armë m’u bllokua dhe përdora tjetrën. Njëri ngeli në vend, ndërsa Dorjani u rrëzua pak më tutje”, ka deklaruar ai. Hoxhaj tregon se fillimisht Shkoza mohoi identitetin e tij, por pasi u konfirmua nga Elio Bitri, u qëllua sërish.
Pas atentatit, Hoxhaj ka zbritur në zonën e Plepat, ku kishte lënë një makinë tjetër për t’u larguar, ndërsa automjeti i përdorur në krim u dogj më pas në Bishti i Zhurit. Sipas tij, Nuredin Dumani ka qenë pas tyre dhe e ka parë të gjithë ngjarjen, duke e përgëzuar më pas: “Më tha: o kusho, doli shumë mirë”.
Sa i përket pagesës, Hoxhaj deklaron se shuma prej 70 mijë eurosh u nda mes tij dhe Elios. “Unë mora 35 mijë euro. Nuk e di sa mori Elio. Lekët, Nuredini më tha se i merrte nga ‘Krymi’”, ka përfunduar ai.
Discussion about this post