Banorët që jetojnë pranë varrezave të reja të qytetit të Durrësit kanë dalë në protestë këtë të shtunë. Përmes një prononcimi për mediat ata thonë se zgjerimi i varrezave, po iu shkakton probleme pasi hapësirat për varre po shkojnë deri pranë shtëpive të tyre. Ata shprehen se, prania e varrezave shumë afër lagjes po sjell makth për fëmijët e tyre. Sipas tyre Bashkia duhet të paktën të ndërtojë një mur rrethues.
“Varret po na mbysin, kërkojmë një mur rrethues, të vijnë ta piketojnë, dhe nëse nuk ka fonde e bëjmë dhe vetë. Ne kemi që në vitin 1990 këtu, nuk mund të jemi pjesë e morteve çdo ditë, djali im 3 vjeç zgjohet natën me makthe. Unë e kam blerë tokën në vitin 1990, ka pasur mur rrethues, dhe ndaj e kemi bërë shtëpinë”, shprehet një prej banorëve.
Ata thonë se fillimisht bashkia ju ka premtuar atyre se nuk do të ketë zgjerim të varrezave pa ndërtuar murin rrethues, premtim i cili nuk është mbajtur. Shqetësimi kryesor i këtyre familjeve padyshim që ka të bëjë me mirëqenien e fëmijëve të tyre.
Discussion about this post