Gjykata e Tiranës ka vendosur sekuestro mbi llogaritë bankare të disa kompanive të ndërtimit, në kuadër të një hetimi mbi burimin e të ardhurave të tyre.
Prokuroria Tiranës ka dhënë detaje në lidhje me sekuestrimin e llogarive bankare të gjashtë shoqërive tregtare, me një vlerë totale prej rreth 73 milionë lekësh, të dyshuara për përfshirje në skema mashtruese me TVSH dhe fshehje të të ardhurave.
Konkretisht bëhet fjalë për subjektet:
-“OLT-FLOR” shpk – në vlerën 6,479,834 lekë;
-“OLTI-Group” shpk – në vlerën 1,542,834 lekë;
-“ALBAVIA” shpk – në vlerën 23,056,593 lekë (TVSH + TF);
-“Kukës Chrome Minerals” shpk – në vlerën 24,570,607 lekë (TVSH + TF);
-“Troci 2005” shpk – në vlerën 10,521,085 lekë (TVSH + TF); dhe
-“STANDART” shpk – në vlerën 6,880,483 lekë (TVSH + TF).
Sipas organit të akuzës, nga hetimet rezultoi se këto subjekte kanë përdorur fatura fiktive me qëllim shmangjen e detyrimeve tatimore.
Sipas njoftimit zyrtar, këto subjekte dyshohet se kanë qenë pjesë e një skeme të organizuar, ku janë lëshuar dhe përdorur fatura për punime dhe shërbime të pa kryera realisht, me qëllim përfitimin e padrejtë të TVSH-së dhe uljen e detyrimeve fiskale.
“Nga analiza financiare rezultoi se vlera e transaksioneve të dyshuara shkon mbi 73 milionë lekë, ndërsa dëmi i mundshëm ndaj buxhetit të shtetit lidhet me mosdeklarimin dhe shmangien e pagesës së tatimeve.
Në këtë fazë të procedimit, organet është urdhëruar:
Sekuestrimin e llogarive bankare në disa banka të nivelit të dytë;
Bllokimin e menjëhershëm të tyre për të parandaluar lëvizjen e fondeve;
Vijimin e hetimeve për identifikimin e plotë të personave të përfshirë”,- thuhet në njoftimin e Prokurorisë.
Hetimet vijojnë për veprat penale “Krijimi i skemave mashtruese në lidhje me TVSH” dhe “Fshehja e të ardhurave”, ndërsa, sipas organit të akuzës nuk përjashtohet marrja e masave të tjera procedurale në vijim.
Discussion about this post