Komiteti Shqiptar i Helsinkit (KShH) ka reaguar pas tensioneve të shënuara gjatë protestës së zhvilluar para Kuvendit, duke shprehur shqetësim për mënyrën e ndërhyrjes së Policisë së Shtetit.
Sipas organizatës, pamjet e publikuara në media tregojnë përdorim force fizike ndaj protestuesve, shoqërime në komisariat dhe raste të tërheqjes zvarrë të qytetarëve.
KShH thekson se këto veprime ngrenë pikëpyetje serioze mbi respektimin e standardeve të të drejtave të njeriut dhe mënyrën e menaxhimit të tubimeve publike.
“E drejta për tubim paqësor garantohet nga Kushtetuta e Shqipërisë dhe Konventa Evropiane për të Drejtat e Njeriut. Çdo kufizim i kësaj të drejte duhet të jetë i parashikuar me ligj, i domosdoshëm dhe proporcional”, thuhet në reagimin e organizatës.
Komiteti kujton se edhe Gjykata Evropiane e të Drejtave të Njeriut ka theksuar se autoritetet duhet të tregojnë tolerancë ndaj protestave paqësore dhe se përdorimi i forcës duhet të jetë vetëm masa e fundit.
“Tërheqja zvarrë dhe përdorimi i forcës fizike ndaj protestuesve ngrenë shqetësime në raport me mbrojtjen e dinjitetit dhe integritetit të personit”, vlerëson KShH.
Organizata nënvizon se protestat e zhvilluara gjatë muajit të fundit kanë qenë në përgjithësi paqësore, ndaj çdo ndërhyrje me forcë duhej të ishte rreptësisht proporcionale dhe në përputhje me ligjin.
KShH u bën thirrje autoriteteve të garantojnë ushtrimin efektiv të së drejtës për protestë, të respektojnë standardet kushtetuese dhe konventore për përdorimin e forcës dhe të sigurojnë të drejtat procedurale për çdo person të shoqëruar.
Njëkohësisht, organizata i kërkon Prokurorisë të hetojë në mënyrë të pavarur dhe efektive çdo pretendim për përdorim të tepruar të forcës gjatë protestës.
Në fund të reagimit, Komiteti i Helsinkit u bën thirrje edhe organizatorëve dhe pjesëmarrësve që protestat të zhvillohen në mënyrë paqësore dhe të shmanget çdo veprim që mund të përshkallëzojë situatën.
Discussion about this post