Një operacion i madh antidrogë në Ekuador ka zbardhur mënyrën e funksionimit të një rrjeti të dyshuar kriminal me origjinë shqiptaro-polake, i akuzuar për trafikimin e tonelatave kokainë drejt Europës.
Operacioni i koduar “Gran Fénix 43 Azkaban”, i zhvilluar nga Policia Kombëtare dhe Prokuroria e Ekuadorit me mbështetjen e Europol-it, zbuloi një strukturë që dyshohet se siguronte drogën në kufirin me Kolumbinë, e grumbullonte dhe më pas e eksportonte përmes rrugëve detare drejt Holandës dhe vendeve të tjera europiane.
Sipas autoriteteve, grupi kriminal lidhet me sekuestrimin e të paktën 7.5 tonëve kokainë që nga viti 2019.
Droga dyshohet se fshihej në ngarkesa me produkte të ligjshme si banane, kafe, produkte deti, dru dhe mallra të konservuara, përmes metodës së njohur si “gancho ciego”, ku pakot me kokainë vendosen fshehurazi në kontejnerë.
Hetimet kanë zbuluar se rrjeti përdorte kompani fasadë, aktivitete tregtare dhe shmangie të mundshme të detyrimeve fiskale për të mbuluar veprimtarinë kriminale.
Në qendër të hetimeve është edhe një shtetas shqiptar me inicialet Daci P., i cili dyshohet nga autoritetet ekuadoriane se ishte një nga drejtuesit e organizatës dhe se koordinonte aktivitetet logjistike në vend.
Sipas dosjes hetimore, ai justifikonte aktivitetin financiar përmes një regjistri tatimor në fusha si gastronomia dhe shërbimet e kateringut, ndërsa autoritetet kanë ngritur dyshime për mospërputhje mes deklarimeve ekonomike dhe aktivitetit real.
Një tjetër person i dyshuar si pjesë e strukturës është shtetasi me origjinë polake Jakimiec T., i cili u arrestua në një operacion të mëparshëm dhe ndaj të cilit rezultonte një njoftim i kuq i Interpolit nga drejtësia polake.
Gjatë kontrollit në banesën e tij u sekuestruan pajisje elektronike, telefona celularë, si dhe armë.
Edhe pse kishte leje për mbajtjen e njërës prej armëve, autoritetet pretendojnë se ai nuk kishte autorizim për mbajtjen e një arme tjetër.
Hetuesit dyshojnë se grupi përdorte edhe kompani në sektorin e eksportit të bananeve për të kamufluar dërgesat e kokainës drejt Europës.
Operacioni vijon të hetohet nga autoritetet ekuadoriane, të cilat po punojnë për identifikimin e personave të tjerë të përfshirë dhe pasurive të krijuara nga aktiviteti i dyshuar kriminal.
Discussion about this post