Komiteti Shqiptar i Helsinkit ka reaguar pas shoqërimit të disa protestuesve gjatë tubimit të zhvilluar pranë Parlamentit, duke dënuar mënyrën e ndërhyrjes së policisë dhe mbajtjen e tyre për disa orë në ambientet e Komisariatit nr. 1.
Kryetarja e Komitetit Shqiptar të Helsinkit, Erdia Skëndaj, në një deklaratë për mediat para komisariatit, u shpreh se raste të tilla duhet të trajtohen në përputhje me ligjin dhe se mbajtja e qytetarëve për periudha të gjata kohore ngre shqetësime serioze.
“Nuk duhet të mbahen në limitin e pesë orarshit. Ne kemi ngritur zërin për këtë çështje. Më vjen mirë që protestuesit u liruan”, deklaroi Skëndaj.
Ajo theksoi se Komiteti do të dokumentojë çdo rast të raportuar dhe do të ndjekë të gjitha procedurat ligjore dhe institucionale për të kërkuar sqarimin e ngjarjeve dhe verifikimin e veprimeve të autoriteteve.
“Do të zbardhim çdo rast dhe do të ndjekim rrugën institucionale për të gjithë”, përfundoi ajo, duke theksuar angazhimin e organizatës për mbrojtjen e të drejtave të qytetarëve.
Discussion about this post