Kuvendi i Kosovës, i dalë nga zgjedhjet parlamentare të 6 qershorit, pritet të konstituohet sot me verifikimin e mandateve dhe betimin e deputetëve të rinj.
Pas kësaj procedure, në rend dite është zgjedhja e kryetarit dhe nënkryetarëve të Kuvendit, ndërsa mbetet ende e paqartë nëse gjatë së njëjtës seancë do të zhvillohet edhe votimi për Qeverinë e re.
Ndërkohë, negociatat mes Lëvizjes Vetëvendosje dhe Lidhjes Demokratike të Kosovës nuk kanë prodhuar ende një marrëveshje për çështjen e Presidentit, megjithëse të dyja palët kanë lënë të hapur mundësinë e vijimit të dialogut.
Kryetari i LDK-së, Lumir Abdixhiku, ka bërë të ditur se nuk synon postin e kryetarit të Kuvendit, duke theksuar se institucionet kryesore të vendit duhet të ndërtohen mbi parimin e balancës politike dhe institucionale.
Nga ana tjetër, Partia Demokratike e Kosovës (PDK) dhe Aleanca për Ardhmërinë e Kosovës (AAK) kanë refuzuar të zhvillojnë bisedime me kryeministrin në detyrë, Albin Kurti, për formimin e institucioneve të reja.
Sipas afateve kushtetuese, nëse brenda 60 ditëve nga konstituimi i Kuvendit nuk arrihet të formohen institucionet e reja, Kosova do të detyrohet të shkojë në zgjedhje të parakohshme, të cilat do të ishin të katërtat brenda rreth një viti e gjysmë.
Discussion about this post