Varg kilometrik në autostradën Tiranë-Elbasan, qindra automjete mbeten të bllokuara në trafik

Një trafik i rënduar ka paralizuar pasditen e sotme aksin Tiranë-Elbasan, duke krijuar një varg kilometrik automjetesh në drejtim të Bradasheshit.

Qindra makina kanë mbetur të bllokuara pranë rrethrrotullimit të Bradasheshit, në zonën e njohur si “hinka”, ndërsa lëvizja vijon me ritme shumë të ngadalta.

Sipas pamjeve të trafikut, radha e automjeteve shtrihet për disa kilometra, nga zona e Reçanit deri në Bradashesh.

Situata është edhe më problematike për shkak të temperaturave të larta, duke bërë që drejtuesit dhe pasagjerët të qëndrojnë për një kohë të gjatë në pritje.

Ky segment është kthyer prej kohësh në një pikë problematike sa i përket qarkullimit, veçanërisht gjatë fundjavave dhe periudhave me fluks të shtuar automjetesh.

Mungesa e një bypass-i që do të shmangte kalimin e gjithë këtij fluksi në Bradashesh mbetet një prej problematikave kryesore, ndërsa trafiku në këtë zonë vijon të jetë një shqetësim i përsëritur për drejtuesit e mjeteve.