Dy sfida, një objektiv! Dinamo dhe Egnatia kërkojnë përmbysjen në Europë

Dinamo City dhe Egnatia do të zbresin në fushë për ndeshjet e kthimit në kompeticionet europiane.

Dinamo City do të përballet nesër me Audën në “Elbasan Arena”, në raundin e tretë të Conference League.

Skuadra e Ilir Dajës vjen pas humbjes 1-0 në ndeshjen e parë në Letoni.

Dinamovitët do të kërkojnë të përmbysin rezultatin dhe të sigurojnë kualifikimin në fazën tjetër.

Sfida në “Elbasan Arena” do të nisë në orën 21:00, ndërsa tifozët pritet të jenë një faktor i rëndësishëm.

Nëse kalon turin, Dinamo City do të përballet në play-off me humbësin e çiftit Pafos–Salzburg.

Ndërkohë, Egnatia do të luajë të enjten një tjetër sfidë vendimtare në Europa League.

Kampionët e Shqipërisë do të presin Shamrock Rovers në “Arena Egnatia”, në orën 21:00.

Egnatia ka një mision më të vështirë, pasi humbi 3-1 në transfertë ndaj skuadrës irlandeze.

Skuadra e Nevil Dedes reagoi në ndeshjen e parë duke barazuar me Jaime në pjesën e parë.

Por vendasit shënuan dy herë në pjesën e dytë dhe morën një avantazh të rëndësishëm.

Tashmë, Egnatia ka 90 minuta për të përmbysur rezultatin dhe për të vijuar aventurën europiane.

Dy skuadrat shqiptare kërkojnë një natë të madhe në Europë, me synimin për të kaluar në raundin tjetër.