Zjarri që prej ditësh vijon të jetë aktiv në zonën e Priskës së Madhe ka marrë përmasa më të mëdha dhe është përhapur edhe në drejtim të Lundrës, Farkës së Madhe dhe Gurrës, duke rritur ndjeshëm rrezikun për banorët dhe pronat e tyre.
lakët kanë përfshirë sipërfaqe të konsiderueshme me bimësi dhe ullishte, ndërsa situata paraqitet problematike për shkak të përhapjes së vatrave.
Raportohet se është djegur edhe një shtepi e pabanuar, ndërsa tre familje janë evakuar për arsye sigurie.
Sipas banorëve të zonës, dhjetëra bagëti kanë mbetur të bllokuara në zonat pyjore të përfshira nga flakët dhe dyshohet se një pjesë e tyre mund të kenë ngordhur.
Gjithashtu, në zonë shquhet edhe një makinë e djegur plotësisht, teksa nuk dihet nëse ka qenë e braktisur apo ende në përdorimin e ndonjërit prej banorëve.
Përballë përhapjes së zjarrit, ndërhyrja po vijon si nga toka, ashtu edhe nga ajri. Dy helikopterë janë angazhuar në operacion, duke marrë ujë nga Liqeni i Farkës dhe duke ndërhyrë mbi vatrat e zjarrit.
Ndërkohë, forcat tokësore ndodhen në terren dhe janë në gatishmëri për të izoluar flakët dhe për të parandaluar përhapjen e tyre drejt zonave të banuara.
Situata vijon të monitorohet, ndërsa përhapja e zjarrit në drejtim të Lundrës ka shtuar shqetësimin për banorët e zonës, teksa tymi ka shkaktuar mjaft shqetësime për ta.
gijotina.com/
Discussion about this post