Presidenti i SHBA-së, Donald Trump, ka shtyrë me tre ditë vendosjen e tarifave të reja prej 50% ndaj një game të gjerë mallrash kanadeze, duke deklaruar se Uashingtoni dhe Otava janë pranë finalizimit të një marrëveshjeje tregtare.
“Kam pezulluar tarifat prej 50% kundër Kanadasë, të cilat ishin planifikuar të hynin në fuqi nesër në mëngjes, për një periudhë tre-ditore”, shkroi Trump në rrjetet sociale, duke shtuar se dy vendet kanë një marrëveshje në pritje të finalizimit të dokumenteve.
Vendimi u njoftua më pak se dy orë para hyrjes në fuqi të tarifave të reja, të cilat do të prekshin rreth 20 miliardë dollarë importe kanadeze.
Kryeministri kanadez Mark Carney konfirmoi përparimin në negociata, por theksoi se ende ka çështje për t’u zgjidhur.
Negociatat përfshijnë tarifat amerikane ndaj automjeteve kanadeze, aksesin e prodhuesve amerikanë në tregun kanadez të qumështit dhe kufizimet për shitjen e alkoolit amerikan.
Sipas Reuters, palët po diskutojnë edhe uljen e tarifave amerikane për automjetet kanadeze nga 25% në 15%, por ende nuk kanë rënë dakord mbi kriteret që do të përcaktonin automjetet që do të përfitonin.
Tarifat e planifikuara do të preknin produkte si vera, produktet e qumështit, çimentoja, veshmbathjet dhe pajisjet e hokejit, duke iu shtuar tarifave ekzistuese për çelikun, aluminin, automjetet dhe drurin kanadez.
Trump tha gjithashtu se një marrëveshje përfundimtare mund të hapë rrugën për ringjalljen e projektit të tubacionit Keystone XL, që do të transportonte rreth 830 mijë fuçi naftë në ditë nga Alberta drejt SHBA-së.
Shtyrja e tarifave shihet si një lehtësim për bizneset në të dyja anët e kufirit, të cilat kanë paralajmëruar për pasoja ekonomike dhe probleme në zinxhirët e furnizimit në rast të hyrjes në fuqi të masave të reja.
Tensionet tregtare mes dy vendeve janë përshkallëzuar që prej rikthimit të Trump në Shtëpinë e Bardhë, ndërsa SHBA dhe Kanadaja po përpiqen të arrijnë një marrëveshje për të shmangur përshkallëzimin e mëtejshëm të luftës tregtare.
Discussion about this post