Në protestën e 86-të kundër qeverisë, një prej protestuesve ka ironizuar platformën e re të prezantuar nga kryeministri gjatë takimit me ministrat në Pogradec, të cilën Edi Rama e ka quajtur “Pasqyra Albania”.
Protestuesi e ka cilësuar platformën si një tjetër përpjekje të qeverisë për të zhvendosur përgjegjësinë për problemet e vendit te administrata shtetërore.
“Ne e refuzojmë, sepse ‘Pasqyra Albania’ nuk është gjë tjetër veçse riemërtimi i platformës së ‘Bashkëqeverisjes’, ‘Shqipëria që duam’. E kemi parë që ‘Shqipëria që duam’ nuk është gjë tjetër veçse një lavatriçe e imazhit të Edi Ramës”, deklaroi ai.
Në përfundim të fjalës së tij, protestuesi ritheksoi kërkesën e qytetarëve që prej nisjes së protestave, dorëheqjen e kryeministrit Edi Rama.
“Ne, si çdo ditë, kërkojmë dorëheqjen e Edi Ramës”, përfundoi ai.
Protestuesi: Sot u gëzova kur e pashë Edi Ramën në Pogradec, sepse e pashë të mplakur edhe pa ide. Kryeministrin, të cilin makineria e tij e propagandës për 13 vite me radhë na e ka shitur si inovator, lider global, me ide të jashtëzakonshme, sot, pas 13 vitesh, po përpiqet për të disatën herë me radhë të njëjtën histori që tregonte edhe Enver Hoxha.
Kam dëgjuar se Enver Hoxha thoshte që nuk kishte fajtor kur njerëzit e sistemit kryenin krime. Edhe Edi Rama sot, për të disatën herë, u përpoq të na tregonte përmes platformës së tij, “Pasqyra Albania”, se ai nuk është fajtor për këtë keqqeverisje që ne po vuajmë, por është administrata shtetërore.
E për ta korrigjuar këtë administratë të korruptuar dhe arrogante, Edi Rama thotë se ka dy mekanizma: njëri është “BESA”, që prej disa javësh na e tregoi, dhe “Pasqyra Albania”.
Ne e refuzojmë, sepse “Pasqyra Albania” nuk është gjë tjetër veçse riemërtimi i platformës së “Bashkëqeverisjes”, “Shqipëria që duam”. E kemi parë që “Shqipëria që duam” nuk është gjë tjetër veçse një lavatriçe e imazhit të Edi Ramës. Ne, si çdo ditë, kërkojmë dorëheqjen e Edi Ramës.
Discussion about this post