Xavi Hernandez ka nisur zyrtarisht aventurën në stolin e Holandës. Trajneri spanjoll kërkon një skuadër me identitet të qartë, që të dominojë ndeshjet dhe të konkurrojë për trofe.
Xavi Hernandez është prezantuar zyrtarisht si trajneri i ri i Holandës, me objektivin për ta rikthyer përfaqësuesen holandeze në elitën e futbollit europian dhe botëror.
Ish-mesfushori dhe trajneri i Barcelonës ka marrë përsipër një sfidë të re pas eksperiencës në klubin katalanas, ku drejtoi skuadrën në 143 ndeshje dhe fitoi një titull të LaLigas dhe një Superkupë të Spanjës.
Në prezantimin e tij, Xavi bëri të qartë filozofinë që dëshiron të ndërtojë te “Tulipanët”. Spanjolli kërkon një ekip që të ketë kontrollin e lojës, të dominojë kundërshtarët dhe të luajë me personalitet.
“Dua të falënderoj të gjithë ata që më kanë mbështetur. Do të përpiqem të jap maksimumin dhe të mos zhgënjej pritshmëritë. Dua një Kombëtare me stilin e saj të lojës, të aftë të dominojë ndeshjet dhe të luajë me vendosmëri e uri për sukses. Do të na duhet kohë, por objektivat janë të qartë”, deklaroi Xavi.
Ai gjithashtu vlerësoi punën e paraardhësve të tij, Louis van Gaal dhe Ronald Koeman, por theksoi se fokusi i tij do të jetë tek e ardhmja.
“Kam respekt maksimal për atë që kanë bërë Van Gaal dhe Koeman. Unë dua të përqendrohem te puna ime dhe te e ardhmja. Tashmë po monitorojmë lojtarët që mund të grumbullohen”, tha tekniku i ri.
Xavi nuk e fshehu ambicien për të synuar trofe me Holandën.
“Jemi këtu për të konkurruar. Duam të përballemi me Kombëtaret më të mira dhe të fitojmë. Ky është objektivi ynë”, u shpreh ai.
Trajneri spanjoll foli edhe për raportin me drejtorin teknik të Holandës, Nigel de Jong, me të cilin ka krijuar menjëherë një lidhje të mirë pune.
“Patëm menjëherë një mirëkuptim. Ai erdhi në shtëpinë time në Barcelonë dhe kjo më tregoi se sa shumë dëshironte të ndërtonim diçka të rëndësishme së bashku”, tregoi Xavi.
Nga ana tjetër, De Jong e cilësoi zgjedhjen e spanjollit si më të mirën për Holandën.
“Për ne ishte zgjedhja më e mirë. Nuk mund të dëshironim diçka më të mirë. Xavi na tregoi menjëherë dëshirën dhe vendosmërinë e tij. Duam të ndërtojmë gjëra të rëndësishme me të”, deklaroi De Jong.
Ai zbuloi gjithashtu se federata kishte kontaktuar katër trajnerë. Një prej tyre ishte Pep Guardiola, me të cilin biseduan pas eliminimit të Spanjës nga Botërori, por trajneri i Manchester City-t kërkoi kohë për pushim. Holandezët tentuan edhe për Arne Slot, por ky i fundit dëshironte të vazhdonte punën në nivel klubesh.
Discussion about this post