Zjarri përfshin masivin pyjor në Bulqizë, mungon ndërhyrja nga ajri

Një situatë alarmante është regjistruar mesditën e sotme në Bulqizë, ku një zjarr ka përfshirë pyjet e Qafë Helmesit, në fshatin Koçaj.

Flakët kanë përfshirë një masiv pyjor me ah dhe pisha, ndërsa situata paraqitet problematike për shkak të përhapjes së zjarrit në zonën pyjore.

Në terren ndodhen punonjës të emergjencave dhe banorë të zonës, të cilët po punojnë për të vënë nën kontroll flakët.

Për shkak të vështirësisë së ndërhyrjes nga toka, kërkohet edhe ndërhyrje emergjente nga ajri e cila deri tani ka munguar.

Zjarri ishte aktivizuar edhe mbrëmjen e djeshme, duke djegur një sipërfaqe të konsiderueshme të masivit pyjor.

Pavarësisht ndërhyrjes, flakët janë riaktivizuar gjatë ditës së sotme, duke rritur rrezikun për përhapjen e mëtejshme të zjarrit.