53-vjeçari shqiptar, Bujar Meço, banues në Rodopi të Greqisë, ka pranuar se ka vrarë bashkëshorten e tij 44-vjeçare. Sipas ekspertizës mjekoligjore, gruaja humbi jetën pas një goditjeje të vetme me thikë në qafë.
Pas krimit, 53-vjeçari tentoi t’i japë fund jetës dhe aktualisht ndodhet i shtruar në spital. Pas daljes nga spitali, pritet të dërgohet para prokurorit.
Sipas informacioneve të mediave greke, pas arrestimit ai ka pranuar autorësinë dhe ka pretenduar se “i janë errësuar sytë” dhe se ka sulmuar bashkëshorten në një moment nervozizmi. Për ngjarjen kanë dhënë dëshmi edhe fëmijët e çiftit.
Sipas ekspertizës mjekoligjore, goditja në pjesën e qafës ishte e thellë. Tehu i thikës ka depërtuar deri në mushkërinë e djathtë, duke shkaktuar hemorragji të rëndë të brendshme dhe të jashtme.
Nuk janë konstatuar dëmtime të tjera në trupin e viktimës. Mjekët ligjorë vlerësojnë se vdekja ka ardhur shumë shpejt, rreth 3 deri në 5 minuta pas goditjes. Thika e përdorur në krim dyshohet se kishte një teh rreth 20 centimetra të gjatë.
Avokatja e viktimës, Evgenia Kolia, ka bërë të ditur se episodi i dhunës në familje i vitit 2022 nuk ishte i vetmi. Sipas saj, 44-vjeçarja ishte sulmuar disa herë nga bashkëshorti i saj.
“Viktima ishte sulmuar shumë herë nga bashkëshorti i saj. Nuk ishte vetëm episodi i vitit 2022”, ka deklaruar avokatja, duke theksuar se bëhej fjalë për një histori dhune që kishte zgjatur ndër vite.
Sipas saj, ndër shkaqet që lidhen me dhunën ishin xhelozia e bashkëshortit dhe përpjekja e gruas për të fituar pavarësi ekonomike.
Avokatja ka nënvizuar gjithashtu se viktimat e dhunës në familje shpesh e kanë të vështirë të largohen nga një marrëdhënie abuzive për arsye ekonomike. Në rastin e 44-vjeçares, sipas saj, rol kishte edhe çështja e lejes së qëndrimit, për të cilën të ardhurat përbënin një kriter të rëndësishëm.
Discussion about this post