Kryeministri i Ontarios, Doug Ford, i është përgjigjur presidentit amerikan Donald Trump pas vendimit të këtij të fundit për të ndryshuar, në përdorimin zyrtar amerikan, emrin e Liqenit Ontario në “Lake America”.
Ford prezantoi një tabelë të madhe të vendosur në anën kanadeze, ku shkruhet: “Lake Ontario. Now and Always” “Liqeni Ontario. Tani dhe përgjithmonë”.
Reagimi erdhi pasi Trump nënshkroi të enjten një urdhër ekzekutiv për përdorimin e emrit të ri nga autoritetet amerikane. Presidenti publikoi gjithashtu në rrjetet sociale disa video të krijuara me inteligjencë artificiale lidhur me liqenin, i cili shtrihet mes Kanadasë dhe Shteteve të Bashkuara.
“Shumë kohë përpara Presidentit Trump, ky liqen quhej Liqeni Ontario. Shumë kohë pasi Presidenti Trump të jetë larguar, ai do të vazhdojë të quhet Liqeni Ontario”, deklaroi Ford.
Kryeministri i provincës kanadeze e lidhi vendimin e Trump edhe me përplasjet e fundit mes dy vendeve, duke pretenduar se presidentit amerikan “nuk i pëlqeu që Ontario dhe Kanadaja mbrojtën veten”.
Duke folur përpara tabelës së re, Ford tha se mesazhi synonte të riafirmonte qëndrimin e provincës së tij.
“Në rast se Presidenti Trump apo dikush tjetër harron, e kemi vendosur këtë tabelë për t’ua kujtuar: është Liqeni Ontario, tani dhe përgjithmonë”, tha ai.
Përplasja vjen mes tensioneve tregtare
Debati për emrin e liqenit zhvillohet në një periudhë tensionesh të reja tregtare mes Uashingtonit dhe Otavës, pasi negociatat mes palëve nuk sollën marrëveshje.
Shtetet e Bashkuara vendosën tarifa të reja prej 50% ndaj rreth 20 miliardë dollarëve mallra kanadeze, ndërsa Kanadaja njoftoi masa tarifore kundërpërgjigjëse, të cilat pritet të hyjnë në fuqi muajin e ardhshëm.
Trump deklaroi se urdhri për emërtimin “Lake America” hyri në fuqi menjëherë pas nënshkrimit. Megjithatë, vendimi përcakton mënyrën se si SHBA-ja i referohet liqenit dhe nuk detyron Kanadanë apo vende të tjera të përdorin të njëjtin emërtim.
Të shtunën, Google njoftoi se emërtimi ishte ndryshuar në shërbimin e hartave për përdoruesit në Shtetet e Bashkuara.
Discussion about this post