Kryetari i Grupit Parlamentar të Partisë Demokratike, Gazment Bardhi, ka reaguar lidhur me bllokimin e disa llogarive në Instagram të qytetarëve që kanë shprehur mbështetje për protestat kundër qeverisë.
Bardhi e ka krahasuar situatën në Shqipëri me zhvillimet në Serbi gjatë protestave masive kundër qeverisë së Aleksandar Vuçiçit. Sipas tij, edhe në Shqipëri po përdoren mekanizma që synojnë kufizimin e zërave kritikë në rrjetet sociale.
Përmes një reagimi publik, Bardhi akuzoi kryeministrin Edi Rama se po përdor censurën për të mbuluar, sipas tij, dështimet e qeverisë dhe për të kufizuar shprehjen e kundërshtarëve politikë.
“Ajo që ndodhi në Serbinë e Vuçiçit gjatë protestave masive të studentëve kundër qeverisë, po shfaqet sot edhe në Shqipërinë e Edi Ramës”, deklaroi Bardhi.
Ai pretendoi se janë bllokuar një numër i konsiderueshëm llogarish në Instagram të qytetarëve që kanë mbështetur aktivisht protestën prej më shumë se tre muajsh.
Sipas Bardhit, bëhet fjalë për një “algoritëm censure” që synon të kufizojë zërat kritikë dhe të largojë nga hapësira publike përmbajtjet që kundërshtojnë qeverinë.
“Me metodat e Vuçiçit, Edi Rama nuk e ndryshon dot bindjen e shqiptarëve se ai është Kryeministri që i ka bërë më shumë keq vendit në gati katër dekada dhe se duhet të largohet”, u shpreh kreu i grupit parlamentar të PD-së.
Në përfundim të reagimit, Bardhi shprehu solidaritet me qytetarët që, sipas tij, janë prekur nga bllokimi i llogarive për shkak të qëndrimeve të tyre kritike ndaj qeverisë.
“Nuk ka algoritëm censure që shpëton një qeveri nga e vërteta”, përfundoi Bardhi.
Discussion about this post