Mbi 15 mijë qytetarë të Kosovës kanë hyrë në Shqipëri brenda pak më shumë se katër orësh mëngjesin e kësaj të shtune, duke shkaktuar fluks të lartë në pikën kufitare të Morinës. Destinacioni kryesor i shumë prej tyre mbetet bregdeti shqiptar, pavarësisht përfundimit të sezonit veror të pushimeve.
Sipas të dhënave të Drejtorisë për Kufirin dhe Migracionin Kukës, nga ora 05:00 deri në 09:15 të 5 shtatorit 2026, përmes Stacionit të Policisë Kufitare Morinë kanë hyrë në territorin shqiptar 15 mijë e 823 qytetarë të Kosovës.
Lëvizja e lartë e udhëtarëve është shoqëruar edhe me një numër të konsiderueshëm automjetesh. Brenda të njëjtit interval kohor kufirin drejt Shqipërisë e kanë kaluar 4 mijë e 107 mjete të vogla dhe autobusë.
Fluksi është regjistruar që në orët e para të mëngjesit, me qytetarë të shumtë nga Kosova që kanë zgjedhur Shqipërinë për të kaluar fundjavën.
Edhe pse periudha kryesore e pushimeve verore ka përfunduar, temperaturat e larta duket se po favorizojnë vijimin e lëvizjeve drejt zonave bregdetare.
Shifrat e kësaj të shtune tregojnë se bregdeti shqiptar vijon të tërheqë një numër të lartë vizitorësh nga Kosova, veçanërisht gjatë fundjavave.
Discussion about this post