Gjermania voton të dielën në Saksoni-Anhalt, ku AfD synon të marrë për herë të parë pushtetin rajonal. Diferencat ekonomike mes lindjes dhe perëndimit, pakënaqësia ndaj emigracionit dhe qëndrimet më të favorshme ndaj Rusisë po ndikojnë në një votë që shihet si test i rëndësishëm për politikën gjermane.
Gjermania përgatitet për një provë të rëndësishme politike. Të dielën votohet në landin lindor të Saksoni-Anhaltit, ku Alternativa për Gjermaninë, AfD, synon një fitore historike dhe marrjen për herë të parë të pushtetit në nivel rajonal nga një forcë e ekstremit të djathtë në Gjermaninë e pasluftës.
Më shumë se tre dekada pas ribashkimit, ndarjet mes lindjes dhe perëndimit vazhdojnë të ndikojnë fort në votë. Pas rënies së Murit të Berlinit, shumë ndërmarrje shtetërore në ish-Gjermaninë Lindore u mbyllën, duke shkaktuar papunësi dhe largim masiv të popullsisë. Edhe sot, pagat dhe kursimet në lindje janë mesatarisht më të ulëta, ndërsa qytetarët e këtyre landeve ndihen më pak të përfaqësuar në politikë dhe ekonomi.
Në këtë klimë, mesazhet kundër emigracionit të AfD-së kanë gjetur terren, edhe pse lindja ka më pak banorë të lindur jashtë vendit sesa perëndimi. Nostalgjia për periudhën e Gjermanisë Lindore, e njohur si “Ostalgie”, është gjithashtu pjesë e debatit. Një tjetër element është Rusia.
Në lindje mbetet më e fortë kërkesa për afrimin me Moskën dhe skepticizmi ndaj Shteteve të Bashkuara dhe aleancës transatlantike. Për qeverinë gjermane, rezultati në Saksoni-Anhalt mund të jetë një sinjal paralajmërues për të gjithë vendin, në një kohë kur pasiguria ekonomike dhe tensionet gjeopolitike po ushqejnë partitë protestuese.
Discussion about this post