“Shkollat po kthehen në zyra partie për socialistët”, Logu ngre akuza ndaj Ballës dhe Sulit

Nxënësit në Kamëz janë kthyer në qendër të një përplasjeje politike mes Partisë Demokratike dhe drejtuesve socialistë të zonës.

Sekretari për Çështjet Ligjore në PD, Marash Logu, akuzon drejtuesin politik të PS-së, Taulant Balla dhe kryebashkiakun Rakip Suli se kanë përdorur rrjetin e qeverive të nxënësve për organizimin e një takimi politik, pak para nisjes së vitit të ri shkollor.

Sipas Logut, përfshirja e nxënësve në aktivitete politike nga funksionarë publikë është e paligjshme dhe përbën vepër penale. Për këtë arsye, ai kërkon që ndaj Ballës dhe Sulit të nisë ndjekja penale.

Në reagimin e tij, përfaqësuesi i PD-së pretendon se shkollat po trajtohen si struktura në funksion të Partisë Socialiste, ndërsa nxënësit si pjesëmarrës në aktivitete partiake.

Logu kërkon gjithashtu që Ministria e Arsimit, zyrat arsimore dhe drejtuesit e shkollave të distancohen nga aktivitete të tilla.

Postimi:

Drejtuesi politik i Partisë Socialiste, Taulant Balla dhe kryetari i Bashkisë Kamëz, Rakip Suli kanë ngarkuar rrjetin e qeverive të nxënësve për të organizuar një takim politik në prag të fillimit të vitit shkollor, duke i trajtuar shkollat si të ishin zyra të Partisë Socialiste, ndërsa nxënësit si të ishin militantë apo patronazhistë partie.

Detyrimi apo organizimi për të marrë pjesë në veprimtari politike i nxënësve të arsimit parauniversitar nga funksionarët publik përbën vepër penale, të dënueshme deri në tre vjet burgim. Taulant Balla dhe Rakip Suli duhet të ndiqen penalisht, ndërsa Ministria e Arsimit, Zyra Arsimore dhe shkollat duhet të distancohen publikisht nga aktivitete të tilla.

Shkollat duhet t’i shërbejnë dijes dhe jo propagandës. Nxënësit nuk janë dekor për takime politike, nuk janë turmë për fotografi, nuk janë aset elektoral për partinë në pushtet. Partia Demokratike dënon me forcë këtë sjellje të Taulant Ballës dhe Rakip Sulit, dhe fton qytetarët e Kamzës, prindërit, mësuesit dhe nxënësit që t’i japin përgjigjen e merituar kësaj dyshe banditësh që keqpërdorin fëmijët për qëllimet e tyre personale dhe politike.

Kamza do të çlirohet shumë shpejt nga dyshja Balla-Suli!