“Rama mori logon e PD-së”, Berisha tregon si do të kandidojnë më 6 mars

Në konferencën për prezantimin e kandidatëve që dolën nga primaret, ish-kryeministri Sali Berisha u shpreh se në 6 mars do të futet në garë me koalicion, pasi sipas tij kryeministri Rama ka konfiskuar siglën e PD.

“Edi Rama ka konfiskuar me një akt madhor kriminal politik siglën e PD-së. Ne e konsiderojmë të konfiskuar dhe qëllimi më madhor ishte që ne të mos merrnim pjesë në këto zgjedhje. Ne marrim pjesë në zgjedhje, sepse bojkoti nuk është opsion për ne. Do të ketë një marrëveshje me një koalicion në përputhje me ligjin dhe në atë marrëveshje do të paraqitet edhe logoja, të cilin cdo shqiptar e ka të qartë, që logon e vërtetë tonë e ka konfiskuar Edi Rama”, tha Berisha.

Ditëve të fundit është aluduar shumë se ish-kryeministri Berisha dhe mbështetësit e tij mund të hyjnë në koalicion me LSI në zgjedhjet e 6 marsit, pasi kreu i kësaj force politike, Monika Kryemadhi ka prishur relatat me Lulzim Bashën.