Deputetja e Partisë Demokratike, Ina Zhupa, i është drejtuar Gjykatës Kushtetuese për ligjin që prek zonën e Pishë-Poro-Nartës, duke kundërshtuar ndryshimet që i kanë hapur rrugë ndërtimeve në këtë territor.
Pas depozitimit të ankimit, Zhupa deklaroi se dokumentacioni i paraqitur në Kushtetuese tregon se niveli i mbrojtjes së zonës është ulur në disa etapa, deri në krijimin e mundësisë për zhvillimin e projekteve të ndërtimit.
“Sapo dola nga Gjykata Kushtetuese ku dorëzova një ankim. VKM që kemi sjellë tregon se fillimisht ulet mbrojtja e Pishë-Poro-Nartë. Ka kategoria e 4, kalohet në kategorinë e 5, në peizazh të mbrojtur”, deklaroi Zhupa.
Deputetja demokrate argumentoi se edhe pas ndryshimit të statusit, nga kategoria e katërt në atë të pestë, një pjesë e konsiderueshme e territorit vijonte të ishte e mbrojtur nga ndërtimet. Sipas saj, situata ndryshoi me miratimin e ligjit të ri.
“Më pas nga kategoria 5, sipas ligjit të kohës, edhe ky peizazh i mbrojtur kishte zonim, ku nuk lejohej të ndërtohej. Ndërsa 43% e peizazhit në Pishë-Poro nuk lejohej që të ndërtohej. Por më pas, me ligjin e ri, lejohet të ndërtohet në Pishë-Poro”, tha deputetja e PD-së.
Zhupa kërkon tashmë që Gjykata Kushtetuese të shqyrtojë ndryshimet ligjore, duke ngritur pikëpyetje mbi mënyrën se si një territor me status të mbrojtur është përfshirë në një regjim që, sipas saj, krijon mundësi për ndërtime.
Discussion about this post