Bojkoti i mësimit nuk ka përfshirë vetëm gjimnazet dhe universitetet në kryeqytet, por është shtrirë edhe në qytete të tjera të vendit, përfshirë Elbasanin.
Studentët e Fakultetit Ekonomik të Universitetit “Aleksandër Xhuvani” në Elbasan kanë bojkotuar mësimin në shenjë proteste, duke lënë bosh auditorët.
Siç shihet edhe nga pamjet, sallat ku zakonisht zhvillohen leksionet janë boshatisur, pasi studentët nuk kanë marrë pjesë në procesin mësimor.
Bojkoti në Elbasan tregon se protesta nuk është kufizuar vetëm në institucionet arsimore të Tiranës, por ka përfshirë edhe studentë jashtë kryeqytetit.
Të parët që nisën bojkotin ditën e sotme ishin gjimnazistë të “Partizanit”, të cilët lanë mësimin dhe më pas bllokuan rrugën që të çon nga gjimnazi në drejtim të Selvisë, ndërsa iu kanë vënë zjarrin koshave të mbeturinave. Ndërkohë, pas tyre u ngritën dhe studentët e Mjekësisë, të cilët u nisën drejt Rrugës së Dibrës për t’u stacionuar para Ministrisë së Arsimit.
Po ashtu, kësaj lëvizjeje i janë bashkuar dhe Fakulteti i Ekonomisë, ndërsa përflitet se bojkoti është bërë dhe nga Fakulteti i Filologji-Historisë, dhe ai Bujqësor.
Aktualisht ka shpërthyer një valë proteste studentore dhe të gjimnazistëve, të cilët kanë zgjedhur të solidarizohen pas protestave të dhunshme që u zhvilluan ditën e djeshme te Ministria e Arsimit, e cila agravoi edhe me përdorimin e forcës dhe dhunës nga ana e Policisë së Shtetit.
Discussion about this post