Një student i Mjekësisë, i maskuar dhe pjesë e protestës para Ministrisë së Arsimit, ka deklaruar se është i gatshëm të shkojë deri në fund për të larguar Edi Ramën nga pushteti.
Në një prononcim për gazetaren Klodiana Lala, studenti u shpreh se, sipas tij, largimi i kryeministrit nuk mund të vijë në mënyrë paqësore, por përmes një revolucioni.
“Si mundet ne po përpiqemi që të ndryshojmë. Revolucionet nuk bëhen paqësore. Ata mund të kenë fëmijët këtu mes nesh. Jam student. Studioj për mjekësi. Ky është revolucion, revolucioni Flamingo. Nuk ka revolucione paqësore. Shih kudo, nuk ka. Ai nuk ikën në mënyrë paqësore.”, tha ai.
Një grup protestuesish kanë shkulur kangjellat metalike dhe sinjalistikën rrugore pranë godinës, ndërsa kanë hedhur sende të forta në drejtim të forcave të policisë.
Më herët, studentët iu drejtuan në kor Forcave Speciale me thirrjen “Mos na provokoni!”.
Ndryshe nga një ditë më parë, uniformat blu ende s’janë kundërpërgjigjur dhe po qëndrojnë brenda perimetrit të godinës.
Ndonëse protesta ishte njoftuar të niste në orën 14:00, demonstrata nisi shumë më herët. Studentë të Fakultetit të Mjekësisë, Fakultetit të Shkencave dhe fakulteteve të tjera bojkotuan mësimin duke u grumbulluar në rrugë për të marshuar në drejtim të MAS.
Bojkoti ishte paralajmëruar nga disa universitete dhe fakultete pas përplasjeve të dhunshme të një dite më parë.
Protestës i janë bashkuar edhe nxënësit e gjimnazit “Partizani”, të cilët kanë bojkotuar mësimin dhe kanë bllokuar rrugën para shkollës së tyre.
Discussion about this post