Studenti protestues Visar Martinaj, i ftuar në News24, ka folur për intensitetin e protestave të ditëve të fundit, duke akuzuar kryeministrin Edi Rama për gjuhë fyese ndaj studentëve dhe përdorim të tepruar të forcës nga policia.
Martinaj u shpreh se dhjetë ditët e fundit kanë qenë të vështira si për protestuesit, ashtu edhe për qeverinë, ndërsa theksoi se studentët kanë vijuar qëndresën edhe në kushtet e lodhjes fizike.
Sipas tij, një pjesë e studentëve janë trembur nga dhuna e ditëve të fundit, por kjo nuk i ka ndalur të vazhdojnë protestën. Ai deklaroi se që prej 31 majit, në vend të përgjigjeve ndaj kërkesave të tyre, studentët janë përballur me komente tallëse dhe etiketime nga kryeministri.
“Dhjetë ditët e fundit nuk kanë qenë asgjë tjetër veçse efektet anësore të protestës së madhe. Ishte më se e pritshme që do të arrihej në këtë revoltë, sepse nëse unë protestoj 140 ditë dhe e vetmja përgjigje që marr nga kryeministri janë komentet ofenduese në rrjetet sociale, atëherë kjo situatë ishte e pashmangshme”, u shpreh Martinaj.
Studenti kritikoi edhe përdorimin e plumbave të gomës gjatë protestave, duke deklaruar se ato janë përdorur pa kursim dhe se plagët e shkaktuara janë të rënda. Ai u ndal edhe te protesta kombëtare e thirrur për të shtunën, duke theksuar se pjesëmarrja nuk kufizohet vetëm te studentët.
“Me Ramën nuk ka dialog. Nuk mund të dialogosh me një dhunues fëmijësh”, deklaroi ai.
Studenti Visar Martinaj: Dhjetë ditët e fundit kanë qenë shumë intensive, si për ne, ashtu edhe për regjimin e Edi Ramës. Aq intensive sa ka pasur ditë kur kemi qenë aq të lodhur, sa mezi ngriheshim në këmbë dhe prapë kemi shkuar në protestë që të rezistojmë sa më shumë. Ditët e fundit studentët janë trembur pak nga dhuna e tepruar që Edi Rama po bën këto ditë me urdhrat e tij.
Problemi është se Edi Rama na ka etiketuar dhe ofenduar me fjalë të ndryshme. Ne jemi munduar gjithë këto ditë, por që nga 31 maji kemi pritur komente tallëse nga kryeministri. Dhjetë ditët e fundit nuk kanë qenë asgjë tjetër veçse efektet anësore të protestës së madhe. Ishte më se e pritshme që do të arrihej në këtë revoltë, sepse nëse unë protestoj 140 ditë dhe e vetmja përgjigje që marr nga kryeministri janë komentet ofenduese në rrjetet sociale, atëherë kjo situatë ishte e pashmangshme.
Propaganda e tij nuk ka funksionuar sepse jemi brez i ri. I vetmi target audience që ai ka kapur janë besnikët e partisë dhe moshat shumë të mëdha, ndoshta. Te brezi ynë kjo nuk funksionon. Në rrjetet sociale i dominojmë. Plumbat e gomës ditët e fundit janë përdorur pa asnjë kursim. Plagët e tyre duken si plumba gjuetie që përdoren për kafshë. Pamjet janë makabre në ekstrem.
Të shtunën është thirrur protesta kombëtare, por nuk janë të ftuar vetëm studentët. Presim të vijnë masivisht studentë nga rrethet, por ata mund të vijnë edhe me familjarët e tyre”, deklaroi Martinaj.
Me Ramën nuk ka dialog. Nuk mund të dialogosh me një dhunues fëmijësh. Rama ka 13 vite që mundohet të hedhë ligje antishqiptare. Protesta është më e madhe se thjesht regjimi. Protesta ka të bëjë me ekzistencën tonë si popull, jo me parti.
gijotina.com/
Discussion about this post