Nënkryetari i Partisë Demokratike, Agron Gjekmarkaj, ka marrë pjesë në prezantimin e programit të kandidatit të PD-së për Bashkinë e Durrësit, Luan Hoti. Gjekmarkaj u shpreh se Bashkia e Durrësit duhet t’i kthehet qytetarëve të saj dhe se Durrësi i ka dhënë histori dhe kulturë Shqipërisë, ndërsa sot këto vlera janë shkatërruar nga Vangjush Dako. Gjekmarkaj kërkoi mbështetjen për kandidatin Luan Hoti, duke e cilësuar si një intelektual me kontribut të madh në qytetin bregdetar.
“Kaq shumë njerëz, qytetarë mblidhen kur vijnë kryetarët. Por ju keni ardhur këtu për kryetarin e ri të bashkisë, zotin Luan Hoti. Shoh këtu qytetarë për Durrësin. Para se të vija në këtë sallë bëra një xhiro nëpër qytet. Dikur për këtë qytet fliste Jul Çezari dhe Mark Antoni, sot flet Gjushi dhe Ardit Çela. Ky qytet, i ka falur shumë Shqipërisë. I ka dhënë histori dhe kulturë. Sot nuk rrezaton këto vlera. Dikush ja ka shkatërruar kujtesën, urbanistikën në emër të interesave personale. Këtë e ka bërë Gjushi për shumë vite. Durrësi meriton të jetë i qytetarëve të tij, jo i mafies për ta parë për interesa personale. Ju ftoj të mbështesni kandidatin më të mirë për këtë bashki, zotin Luan Hotin. I cili nuk është një kandidat emergjence për një vit. Por kryetar bashkie për disa vjet. Jam i bindur se ka kontribut për qytetin, duhet t’ia njohin përmes mbështetjes. Meqenëse Durrësi është një qytet elitar, ju bëj thirrje nga kjo tribunë, të mos kenë frikë. Qytetarët e lirë duhet të mbështesin Luan Hotin pasi mbështesin veten, familjen. Nuk mund të jetë Durrësi peng i akullores, nxirreni nga historia e shëmtuar e 15 viteve të fundit. Çlirojeni Durrësin nga kjo situatë, Durrësi do qëndrojë këtu, nuk do e marrim me vete në Tiranë” – tha Gjekmarkaj.
Luan Hoti është kandidati i Partisë Demokratike për Durrësin në zgjedhjet e 6 Marsit, ndërsa përballë do të ketë Emirjana Sakon, e cila ka qenë e emëruar në këtë bashki.
Discussion about this post