Ambasada e SHBA-ve në Tiranë, e përfaqësuar nga Yuri Kim, ka reaguar pas vendimit të Gjykatës Kushtetuese për të mos shkarkuar presidentin e vendit Ilir Meta, pavarësisht kërkesës së Kuvendit.
Përmes një postimi në Facebook, Kim tha se përmes këtij vendimi, Kushtetuesja po demonstron aftësinë për të qenë e pavarur dhe profesionale, ndërsa shton se SHBA mbështet Reformën në Drejtësi.
“Gjykata Kushtetuese e Shqipërisë, e cila u bë funksionale në dhjetor të vitit 2020, po demonstron aftësinë për të përmbushur funksionin e saj parësor dhe thelbësor duke shqyrtuar faktet dhe argumentet e paraqitura nga palët përkatëse, duke diskutuar mbi këto fakte dhe argumente në bazë të Kushtetutës dhe duke dhënë vendime që pasqyrojnë pavarësi dhe integritet. Shtetet e Bashkuara mbështesin fuqimisht zbatimin e reformës në drejtësi, përfshi një gjyqësor profesional, të pavarur, si institucion thelbësor për të garantuar shtetin ligjor, si dhe ndarjen dhe balancimin e pushteteve”, shkruhet në njoftim.
Kujtojmë se, Kushtetuesja doli dje në përfundimin se pretendimet e ngritura nga Parlamenti nuk cilësohen në shkeljet flagrante të Kushtetutës, aq sa për të shkuar në shkarkimin e Presidentit.
Discussion about this post