Ish-kryeministri Sali Berisha i është përgjigjur deklaratës së ambasadores Yuri Kim për kandidatët në zgjedhjet e 6 marsit. Në një deklaratë zyrtare, Berisha shkruan se ndërhyrja e ambasadores në zgjedhje është në shkelje flagrante të ligjeve dhe Kushtetutës se vendit, bërë në mbështetje të qeverisë Rama duke ndikuar tek elektorati.
“Ndërkohë që fushata për zgjedhjet e pjesshme vendore të 6 Marsit ka nisur zyrtarisht, ambasadorja e SHBA, Yuri Kim ka bërë sot në Twitter ndërhyrjen e saj të radhës, në shkelje flagrante të ligjeve dhe Kushtetutës se vendit, në mbështetje narkoqeverisë së Tiranës. Ajo, defacto, ju ka bërë thirrje zgjedhësve se për kë duhet të votojnë. Komisioni i Rithemelimit të Partisë Demokratike, denoncon deklarata të tilla politike nga përfaqësues të huaj gjatë fushatave elektorale. Komisioni i konsideron ato si ndërhyrje të palejueshme, të papranueshme, e të njëanshme në procesin zgjedhor, në rastin konkret në favor të qeverisë më të korruptuar të Europës”, shkruhet në deklaratë.
Berisha i kërkon Yuri Kim të tërheqë deklaratën që sipas tij është në kundërshtim me Kushtetutën, ndërsa shprehet se dënon çdo ndërhyrje në procesin zgjedhor.
Discussion about this post