Kryetarja e Lëvizjes Socialiste për Integrim, Monika Kryemadhi ka reaguar menjëherë pas konferencës së jashtëzakonshme për shtyp të kryeministrit Edi Rama lidhur me krizën energjetike, ku paralajmëroi sërish një rritje çmimesh.
Në një postim në “Facebook”, Kryemadhi i drejtohet Ramës, duke u shprehur se rritja e çmimeve varet drejtpërdrejt nga politikat që ai ndjek duke u krahasuar me Kosovën dhe Maqedoninë e Veriut. Kryemadhi tha se nafta që merr Kosova importohet në Durrës, por çmimet atje janë më normale.
“Më e pakta mbyll gojën dhe na kurse të vjellat. Lufta nuk është gjendje psiqike, por shpallet sipas parashikimeve ligjore. Shqipëria nuk ka shpallur ligjërisht gjendjen e luftës dhe çmimet e karburanteve, energjisë elektrike, taksat e larta, janë të ndikuara vetëm prej vendimmarrjeve të Edi Ramës në krye të qeverisë. Qytetarët në Maqedoninë e Veriut, vend i cili nuk prodhon asnjë fuçi naftë, e marrin naftën më lirë dhe cilësisht më të mirë se qytetarët tanë. Nafta që marrin qytetarët e Kosovës importohet në Durrës, transportohet deri atje dhe në pompa është më e lirë se nafta që marrin qytetarët tanë. Kaq duhet të mjaftojë për të kuptuar cili është ndikues për shtrenjtimin aktual të karburanteve, produkte jetike që ndikojnë ekonominë e çdo familje dhe biznesi në vend. Ndryshe nga vendet e tjera të Evropës që vuajnë për burime të prodhimit të energjisë, Shqipëria është e pasur në nëntokën e saj me naftë, e bekuar me burime hidrike për prodhim energjie, me diell përgjatë gjithë vitit”, shkruan Kryemadhi.
Kryemadhi i bëri thirrje qytetarëve të mos besojnë gënjeshtrat e Ramës, por sipas saj ai duhet të mbajë përgjegjësi për vendimet e tij.
Discussion about this post