Në Shqipëri turizmi ngelet poshtë niveleve të para pandemisë për periudhën Janar-Shkurt 2022. Një ndër shkaqet ngelet rënia e fluksit nga Kosova.
Për dy muajt e parë të vitit, për periudhën Janar-Shkurt në Shqipëri kanë hyrë 395 mijë shtetas të huaj, me një rritje prej 15% në krahasim me të njëjtën periudhë të një viti më parë, kur vendi kishte lehtësuar masat shtrënguese nga pandemia sipas INSTAT.
Megjithatë në krahasim me Janar-Shkurt 2019, që ka qenë dhe viti më i mirë i turizmit shqiptar, hyrjet janë 5% më të ulëta.
Kosovarët që mbajnë peshën kryesore të turizmit shqiptar në periudhën e pandemisë, kanë vazhduar të jenë me rënie edhe në shkurt. Për Janar-Shkurt 2022, hyrjet e shqiptarëve nga Kosova ishin 21% më pak se në Janar-Shkurt 2021 dhe gati në të njëjtin nivel me periudhën e para pandemisë. Vendosja e kriterit të vaksinimit dhe testit molekular nga qeveria e Kosovës në fillim të vitit ndikoi në uljen e hyrjeve nga Kosova në Shqipëri, duke dhënë impakt negativ tek turistët.
Por rënia e turistëve nga Kosova, në krahasim me përiudhën Janar-Shkurt 2021, është plotësuar nga hyrjet e shtuara nga Greqia dhe Italia. Hyrjet e nënshtetasve të huaj nga Italia ishin 20% më të larta krahasur me periudhën e para-pandemisë, ndërsa nga Greqia ngelen 34% më pak sipas INSTAT.
Hyrjet e shtetasve nga Maqedonia e Veriut dhe Mali i Zi, të cilët zënë vendin e dytë dhe të tretë pas Kosovës ishin pothuajse në të njëjtat nivele të një vit më parë.
Hyrjet e shtetasve shqiptarë dhe të huaj në territorin shqiptar, në muajin Shkurt 2022, janë 458,951 dhe krahasuar me Shkurt 2021 rezulton me një rritje 27,3%. Në Shkurt 2022, numri i shtetasve të huaj që kanë hyrë në territorin shqiptar është 200, 997. Në krahasim me Shkurt 2021, numri është rritur me 27,1% sipas INSTAT.
Vendet të cilat kanë hyrjet më të larta në Shqipëri, Spanja dhe Greqia kanë rritjen më të madhe me nga 4,3 herë për dy muajt e parë të vitit 2022. Kosova ka ardhur në rënie me 21,1%, në krahasim me të njëjtën periudhë të 2021.
Numri i shtetasve shqiptarë që kanë dalë nga Shqipëria gjatë peridhës Janar-Shkurt 2022 është 665,623 duke u rritur 33,0%, në krahasim me të njëjtën periudhë të vitit 2021.
Burimi: INSTAT
Discussion about this post