Nënkryetarja e PD-së, Jorida Tabak, ka paralajmëruar sot një tjetër kallëzim penal për aferën e inceneratorëve. Pas arrestimit të Lefter Kokës dhe Alqi Bllakos, ajo thotë se nuk do të ndalen me kaq, por do të vazhdojnë derisa para drejtësisë të vihen të gjithë ata që janë përfshirë në këtë llum.Tabaku shkruan se PD ka faktuar përgjegjësinë ligjore dhe penale të kryebashkiakut të Fierit Armando Subashi, sekretarit Ëngjëll Agaçi, zv/kryeministrit Arben Ahemtaj si dhe vetë kryeministrit Rama në procedurat për shpronësimin e tokës për inceneratorin e Fierit.
“Partia Demokratike ka faktuar tashmë përgjegjësinë ligjore dhe penale të kryebashkiakut Subashi, sekretarit të Qeverisë Agaçi, ministrit Ahmetaj dhe kryeministrit Rama në procedurat e shpronësimit të tokës për inceneratorin e Fierit. Megjithatë, ne vijim edhe të fakteve të reja të bëra publike, ekspertet ligjorë të Partisë Demokratike po përgatisin një shtesë kallëzimi penal, ku analizohen në mënyrë të detajuar përgjegjësitë e Ramës, Ahmetaj, Agaçit dhe Subashit.
Afera e inceneratorëve nuk mund të mbyllet me ish-ministrin Koka dhe ish-deputetin Bllako, ata ishin hallkat e fundit të një zinxhiri të lartë politikanësh të lartë, që fillonin nga zyra e kryeministrit dhe vijonin në zyrat e ministrive deri në bashkinë Fier”, shkruan ajo.
Kujtojmë se pas denoncimeve të PD dhe fakteve që ata publikojnë, sidomos me zhvillimin e Komisionit Hetimor, i pari u arrestua për aferën e inceneratorëve ish-ministri Lefter Koka, ndërsa ditën e djeshme iu vunë prangat deputetit Alqi Bllako.
Discussion about this post